O obxectivo do Celta Zorka Recalvi neste 2021 é claro: voltar ao máis alto da táboa para loitar por ascender de categoría. O rival a bater, o GDKO Ibaizabal, no que será o primeiro partido do ano en Navia, o próximo mércores, 6 de xaneiro, ás 18:00 horas.
O Celta pasou a maior parte da primeira volta ocupando a segunda posición, pero os últimos catro partidos o desprazaron ata a quinta, onde sitúanse con 22 puntos, a dous do segundo clasificado, o Osés Construcción Ardoi.
Unha vitoria podería devolvelas a ese segundo posto, sempre detrás do BAXI Ferrol., como xa sucedera na primeira volta. O anterior partido que enfrontou a galegas e vascas, resultou nunha vitoria celeste cun axustado 59-66.
Aquel duelo demostrou sobre o parqué a igualdade entre ambos conxuntos, aínda que cun plantel celeste superior a partir do segundo cuarto, cando iniciou unha remontada que lle valería dous puntos e a volta á posición de prata.
Pola súa parte, o GDKO Ibaizabal chega ao encontro da décimo cuarta xornada de Liga Feminina 2 en oitava posición, cun empate entre as vitorias e derrotas (seis de cada unha) e de sufrir unha derrota no duelo vasco ante o Azkoitia Azpeitia.
O rival do Celta contará ademais entre as súas filas con dúas novas caras. Trátase de Nerea Vázquez e Ainara Ramasco, ambas xogadoras fichadas durante o mercado de inverno, e que poderían estrearse coa camiseta verde na pista viguesa.