O Celta Zorka Recalvi estivo preto de lograr o ansiado ascenso á LF Endesa, pero o soño quedou fóra das mans das viguesas. Tras sufrir unha derrota (80-69) ante o Recoletas Zamora nun partido con todo en contra, as galegas caeron na eliminatoria que daba acceso á fase de ascenso.
Castigado polas lesións, con baixas importantes como a de Celia García, habitual nos equipos titulares de Cristina Cantero, o plantel celeste enfrontábase a un escenario desfavorable.
A lixeira vantaxe conseguida en Navia na ida (54-49), non bastaba para aportar tranquilidade ás viguesas, que con todo mantiveron as súas opcións ata finais do duelo contra o Recoleta Zamora. Finalmente serán as locais as que xoguen esta fin de semana a final a catro en Murcia.
Duro comezo para o Celta
O cadro zamorano golpeou primeiro, cun primeiro parcial 13-3 que inclinaba a balanza ao seu favor, e en contra do Celta. O club galego vía ademais como Lucía Fontela mancábase no minuto catro, deixando ao equipo sen aleros nacionais.
Cantero parou o reloxo para optar por outra estratexia que parara os pés ao Zamora e especialmente a Ezeigbo, que dominaba na pintura. As instruccións da adestradora xurdiron efecto, e o cadro galego viuse renovado coa entrada de Musa. A base de rebotes, as viguesas recortaban distancia, pero a vitoria seguía en mans locais (23-9).
Para o segundo cuarto, o Celta confiaba en Sara Castro para levar a batuta dos ataques, que obrigaron a pedir un tempo morto ao técnico rival, Jacinto Carbajal, pasado o ecuador do parcial.
Malia os esforzos vigueses, o Zamora seguía dominando o encontro e mantendo a súa vantaxe, sentenciando a primeira parte cun parcial 9-0 en cuestión de minuto e medio. O descanso chegaría cun 44-23.
Esperanza celeste
Tras a reanudación, as xogadoras de Cantero melloraron a súa efectividade en ataque, mirando de ti a ti ás rivais. Nas liñas celestes unha eficaz Mariona Martín anotaba desde a liña de tres en tres ocasións para achegarse ás locais.
Pero a sorte non sorría ás galegas, xa que a propia Mariona sufriría minutos despois unha recaída da súa lesión de xeonllo, co partido nun 59-38 a falta de 13 minutos. Lonxe de virse abaixo, as celestes que seguían no parqué zamorano deixáronno todo na pista. Triplo tras triplo, o Celta lograba facer o 66-49 para o cuarto final.
Malia as dificultades, as visitantes foron capaces de asinar un parcial 12-0 no inicio do último tempo. Cun xogo coral, as galegas encendían as alarmas do Zamora, colocándose a sete puntos a pouco máis de tres minutos para o final.
No bando rival, as locais facían un parcial 7-0 que volvía inclinar o guion ao seu favor. A reacción celeste non foi suficiente, e cos tantos de Gala Mestres, MVP do encontro, o Zamora acadou a súa praza na fase final (80-69).
Orgullosos de nuestro equipo por su implicación, por su calidad humana. Tod@s en una misma dirección.
#celestedecorazon#LFChallenge pic.twitter.com/VEKnMnxw9r
— CELTA BALONCESTO (@Celtabaloncesto) April 24, 2022
O Celta despide unha tempada na categoría de prata desde a oitava posición, facendo historia no primeiro curso da LF Challenge.
RECOLETAS ZAMORA (80): Isa Latorre (14), Morgan Green (8), Gala Mestres (23), Ornella Santana (0), Nneka Ezegibo (15) -cinco inicial-. Tamén xogaron: Clara Che (4), Chelsea Waters (2), Marta Gómez (3), Marta Montoliu (6) e Ijeoma Ajemba (5)
CELTA ZORKA RECALVI (69): Mariona Martín (8), Lucía Fontela (0), Jessica Fecquiere (12), Maggie Mulligan (2), Marita Davydova (10) –cinco inicial-. Tamén xogaron: Murjanatu Musa (10), Laia Lamana (10), Angela Coello (2), Sara Vidal (0) e Sara Castro (15)
PARCIAIS: (23-9) (21-14) (22-26) (14-20)
ARBITRAXE: Hector Sanhermelando García e Josep Lluis Presseguer Bombardo. Sinalaron 18 faltas a Recoletas Zamora e 15 faltas a Celta Zorka Recalvi.
INCIDENCIAS: Partido correspondente ao segundo encontro da eliminatoria de cuartos de final da fase de ascenso a LF Endesa, disputado no pavillón Angel Nieto (Zamora) ante 900 afeccionados. No descanso o club local presentou ás súas categorías inferiores.
