O club do Celta Zorka Recalvi presentou este martes ao seu primeiro equipo ao completo na sede do Grupo Recalvi. O conxunto galego compite nesta tempada 2021-2022 na nova LF Challenge, en busca dun posto para a LF Endesa, e na súa presentación estivo respaldado por representantes de distintas institucións.
Entre elas estivo a Secretaría Xeral para o Deporte, con José Ramón Lete Lasa, quen lembrou algúns dos fitos do club celeste desde a fundación do mesmo a finais dos 60 como as súas tres Copas da Raíña gañadas de xeito consecutivo ou as súas cinco ligas, así como os nomes de grandes xogadoras e pioneiras como Ángeles Liboreiro, Susana García, Ángeles Araujo, Piluca Alonso ou Marisol Paíno.
Lete Lasa tamén destacou a Maribel Lorenzo, a primeira xogadora galega que ingresa no Hall of Fame español e que foi capitá do Celta que gañou a Liga no ano 77. “Todos estes logros falan dun camiño de éxito, que de seguro volveredes a transitar para acadar ese ansiado regreso á máxima división nacional”, dixo.
O mandatario galego tamén ratificou a aposta da Xunta de Galicia polo deporte feminino como demostra o Plan de Patrocinio contra a violencia de xénero dos equipos de alta competición femininos de 1º e 2º máximo nivel estatal de Galicia 2021 que pasa, na súa segunda convocatoria de 150.000 euros a máis de 250.000 e de 9 equipos patrocinados, a 26, sendo un deles o Celta Zorka Recalvi. Así mesmo, agradeceu o traballo e o apoio da iniciativa privada que no caso do Celta, conta con grandes patrocinadores como Zorka, Recalvi, Grupo Cenxa ou Grupo CDC.
Tamén acudiron ao acto David Regades (Delegado de Zona Franca), Marta Fernández- Tapias (Delegada Territorial da Xunta de Galicia), Gorka Gómez (Deputado Provincial de Deportes), Manel Fernández (Concelleiro de Deportes) e Francisco Martín (Presidente da Federación Galega de Baloncesto), ademais de Patricia García (directora xeral Grupo Femxa) e Carlos Calo (CEO Grupo CdeC), ambos patrocinadores do club, xunto a unha ampla representación da xunta directiva do Celta.
