Case sen tempo para recompoñerse da durísima derrota contra o Barça CBS, o Celta Zorka Recalvi competirá no segundo partido do Grupo 1 contra o Pacisa Alcobendas. O encontro será este venres, 9 de abril, ás 20:00 horas.
Este será un duelo vital para a continuidade das celestes na loita polo ascenso. As de Cristina Cantero precisan unha vitoria para seguir metidas na Fase Final da LF2.
Enfronte, o Celta terá a un contrincante forte. As madrileñas remataron segundas no grupo B na primeira fase, con 17 vitorias e 9 derrotas. O partido deste venres será o primeiro da Fase Final para o Alcobendas.
O Celta xoga contra un equipo con experiencia
Pero máis aló dos números das xogadoras de Julián Sánchez, cunha media de 71,2 puntos por partido, e unha porcentaxe de acerto desde os tiros de dous de máis do 50%, o que fai saltar as alarmas celestes é a súa veteranía.
Como explicaba Cristina Cantero a As Nosas, o Alcobendas é un conxunto que se caracteriza por ter xogadoras veterás nas fases de ascenso, ademais de ser un equipo moi físico.
Por iso, a adestradora do Celta considera que as claves do partido pasarán por controlar os tempos e ser máis fortes desde a defensa.
Ademais, no conxunto rival as celestes enfrontaranse a unha galega. A coruñesa Paloma Dorda compite no Alcobendas e nesta xornada encontrarase na pista coas viguesas.
No bando local, Cantero repetirá presumiblemente o quinteto inicial do encontro ante o Barça, con Martín, García, Julien, Stamenkovic e Davydova. Neste duelo, as galegas dominaron a meirande parte do partido malia perder nos últimos minutos, castigadas polos seus propios nervios.
Como é costume, o partido poderá seguirse vía streaming a través do Canal FEB, que onte sumou máis de 4.500 espectadores no Celta vs Barça.
🔵 EL PARTIDO|
🏆 Fase de Ascenso LF2
📆 9 Abril
⏰ 20:00 h
🆚 @cbalcobendas
🏟 Pabellón Europa- Leganés
📺 https://t.co/60bmqsE0dv#VigoCidadeFermosa #FaseFinalLF2— CELTA BALONCESTO 💙 (@Celtabaloncesto) April 9, 2021
