O Celta Femxa Zorka logrou unha meritoria vitoria na pista do Osés Construcción Ardoi no partido adiantado da oitava xornada, debido ás ventás FIBA de seleccións nacionais. Como ocorreu diante do Recoletas Zamora e do Melilla Ciudad del Deporte La Salle, as celestes déronlle a volta ao marcador nos derradeiros segundos do encontro, cando perdían por seis puntos.
Ver esta publicación en Instagram
Como indica a crónica de Nano Ameneiro na páxina oficial do club, o Celta Femxa Zorka está a facer da epopea a súa rutina. Dos sete partidos da presente tempada, en tres das súas vitorias conseguiu darlle a volta a un marcador que noutros contextos sería unha derrota segura.
Nesta ocasión, as celestes puideron remontar de novo ante Osés Construcción Ardoi, que durante moitos minutos presentou unha batalla na súa pista e vendeu cara a súa derrota. O partido, como tantos outros desta tempada, foi un motivo de reencontros. Ambos equipos foran os que descenderan a tempada pasada da Liga Feminina Endesa.
Nas filas do Osés Construcción estaban dúas xogadoras con pasado recente en Vigo: a base madrileña Lucía Gutiérrez (2024-25) e a escolta canaria Sara Castro (2021-22).
Ver esta publicación en Instagram
Nas filas celestes militan dúas protagonistas do ascenso da entidade navarra na tempada 2023-24 á Liga Feminina Endesa: a dupla arxentina Boquete – Diana Cabrera, que foi homenaxeada no seu regreso a Pamplona recibindo un recordo no centro do campo antes do inicio do partido.
De acordo co recollido na web do cub, o conxunto celeste comezou moi activo, e en só dous minutos endosou un parcial de 0-8 para colocarse rapidamente por diante.
A mala noticia chegou coa segunda falta persoal de Jessica Kelliher no terceiro minuto, que a mandou directamente ao banco. Mentres estivo en pista, rendeu, pero apenas puido estar 17 minutos en cancha polas faltas. Non era normal o desacerto do Osés Construcción Ardoi e, tras o tempo morto solicitado por Juancho Ferreria, co marcador en 2-12, as súas xogadoras comezaron a producir en ataque.
Froito diso o partido igualouse en intensidade, tirando o Celta Femxa Zorka do acerto de Sara Vizmanos, que, áxil no rebote ofensivo, converteu tras rebote dúas accións que permitiron manter por diante ás viguesas ao final do primeiro cuarto (10-19).
Ao comezo do segundo cuarto, ambos equipos estiveron dous longos minutos sen anotar, ata que Vicu Llorente, cun triplo, rompeu a seca, o que levou ao tempo morto de Cristina Cantero (13-19 a 7:36, 2ºC). Ardoi culminaba a remontada e púñase por diante. Coas celestes en defensa zonal, o parcial elevouse a 11-0, cortado cun tiro libre de Uxía Rodríguez.
O certo é que as olívicas do Celta Femxa Zorka tardaron máis de cinco minutos en volver anotar en xogo. As locais encadearon varias accións de tres puntos que romperon a defensa celeste, que en ataque se centrou nas súas pívots. Unha motivada Sara Castro lideraba o seu equipo en ataque, mentres que as celestes caían en imprecisións. O resultado ao descanso (32-29) devolvía a iniciativa ás navarras. Tras a pausa regulamentaria, o partido converteuse nun toma e daca en ambas zonas.
O Celta Femxa Zorka pecaba de conceder segundas opcións por non pechar ben o rebote defensivo. Tampouco era o momento das pamplonesas, que tras lograr unha boa vantaxe (39-31), non foron quen de afianzala, e depois dunha técnica ao banco local, as viguesas lograron empatar de novo o encontro (41-41, 3ºC a 3:30). Os dous equipos naufragaron no tiro exterior (0/10 as navarras, 0/6 as viguesas).
Aínda así, as visitantes sacudiron o dominio local e unha canastra baixo o aro de Kelliher, nos seus mellores minutos sobre o parquet e coincidindo coa bucina de final do cuarto, colocou ás olívicas por diante (45-49). A cuarta falta persoal da xogadora nacida en Wisconsin mandouna ao banco cando faltaban oito minutos para o final. Semellaba que se repetía a historia do segundo cuarto, co Celta bloqueado tras un arranque positivo para as locais (51-49 a 7:23) e Cristina Cantero pedía tempo morto.
A polémica chegou tras un roubo de Diana Cabrera, que pasou de ter opción de empatar o encontro a converterse tras unha falta persoal e unha técnica sinalada a Cristina Cantero (60-55 a 4:00). Kelliher cometeu unha falta innecesaria que a expulsou do partido a 2:30 do final, co equipo seis abaixo tras o tempo morto (61-55 a 1:38). Todo parecía tinguirse de negro no horizonte celeste.
O Celta Femxa Zorka a cada a vitoria na recta final
Con todo, a reacción produciuse de novo. Todo comezou cunha canastra de Andrea Boquete pisando a liña de tres puntos, que achegou ás viguesas, seguida dun novo roubo tras o tempo morto local, para empatar a 62 a falta de 58 segundos. Tras dous ataques fallidos e cando quedaban 18 segundos, Diana Cabrera dispuxo de dous tiros libres, que converteu.
A última defensa do Celta Femxa Zorka foi satisfactoria e Carlota Menéndez sentenciou desde a liña de tiros libres a 2 segundos do final. A remontada volvía ser unha realidade, nunha pista complicada como a do Osés Construcción, e nunha xornada intersemanal que deixa ás celestes, ás portas de recibir ao colista da competición, con ganas de marchar ao parón polas ventás FIBA en racha de vitorias.
Ver esta publicación en Instagram
FICHA TÉCNICA
62) OSÉS CONSTRUCCIÓN: Faustine Parra (5), Lucía Gutiérrez Lancho (2), Sara Castro (21), Julieta Mungo (2), Aixa Wone (4) – cinco inicial -. Tamén xogaron: Mamen Blanco (2), Vicu Llorente (9), Amaia Díez (6), Miriam Recarte (4), María Asurmendi (7).
66) CELTA FEMXA ZORKA: Carlota Menéndez (10), Uxía Rodríguez (2), Andrea Boquete (13), Jessica Kelliher (10), Diana Cabrera (16) – cinco inicial -. Tamén xogaron: Martina Vizmanos (9), Deva Bermejo (3), Sara Vidal (0), Naiara Martínez (0), Jiselle Thomas (3), Paula Salinas (0).
PARCIAIS: 10-19, 22-10, 13-20 e 17-17.
EQUIPO ARBITRAL: Javier Sáez Ruíz e Alexis Fuentes Magarzo. Sinalaron 24 faltas ao Osés Construcción e 25 faltas ao Celta Femxa Zorka.
INCIDENCIAS: partido anticipado da oitava xornada da Liga Femenina Challenge da tempada 2025-26 disputada no pavillón municipal de Arrosadía (Pamplona).
