O Celta Zorka Recalvi segue dando pasos no 2022 para escalar posicións na LF Challenge. Despois de comezar o ano vencendo ao RACA, as celestes sumaron a segunda vitoria consecutiva na recuperación do partido ante o NB Paterna, gañando por un 81-79.
Tras este resultado, as galegas son oitavas, cun total de 26 puntos, estando na loita por acceder aos primeiros postos. Nesta semana, o líder do grupo é o Barcça CBS, con 33 puntos, seguido polo Pacisa Alcobendas, que suma 31.
As viguesas xogaban en casa, en Navia, e foron capaces de controlar o partido malia enfrontarse a un rival duro de principio a fin. O Celta levaba as iniciativas, pero tivo que apretar ata os últimos minutos para afianzar os dous puntos do triunfo.
Á fin do encontro, Dovydova destacou unha vez máis, sendo clave para decantar o duelo para as galegas. A xogadora foi a MVP do encontro, sumando 23 créditos de valoración.
Vantaxe celeste na primeira metade
O partido comezaba en Navia cunha cancha a estrear, tras as reformas levadas a cabo recentemente no pavillón. Alí, as celestes comezaron con Davydova e Castro liderando os ataques desde o quinteto titular, adiantando ás viguesas no marcador fronte a un conxunto rival que confiaba no acerto baixo o aro da veterana Itziar Germán.
O primeiro cuarto resolvíase cunha vantaxe de catro puntos para o Celta e co 28-24 no electrónico. Para o segundo tempo, o pulso mantívose entre ambos equipos, coas galegas salvando o encontro a base de triplos e tiros libres. O descanso chegaría co 51-45 no luminoso.
Vitoria salvada malia o derradeiro cuarto
Á volta de vestiarios, o Celta seguiu erixíndose como conxunto superior, aínda que o Paterna apretou tras a reanudación, achegándose perigosamente ás viguesas. Estas souberon reaccionar, mantendo a raia ás visitantes, que pasado o ecuador do terceiro cuarto só foron quen de anotar dous puntos máis.
O colchón de puntos conseguido volveríase trascendental para o triunfo local. Nos últimos dez minutos, as de Cristina Cantero levantaron o pé do acelerador.
O Paterna aproveitou a súa ocasión para poñer ás celestes contra as cordas, destacando especialmente desde os tiros de dous e a base de intentos desde a liña de tres. Porén, o Celta soubo aguantar e asinou a vitoria por un 81-79 final.
