O Celta acada un posto para a fase de ascenso a Liga 1

Dez vitorias consecutivas e un pase directo á fase de ascenso. O Celta Zorka Recalvi comeza marzo da mellor maneira posible grazas á súa vitoria contra a ADBA, nun encontro que finalizou nun 39-70.

Malia competir contra un equipo case doutra liga (a ADBA loita na zona baixa por non descender), este non era un partido irrelevante para as celestes. A falta de entón catro xornadas, as galegas viaxaban a Asturias en busca dos dous puntos que lle deran un posto para loitar polo ascenso.

Máis dous por décima vez consecutiva no Celta

Coas baixas de Maja Stamenkovic e Clara Prieto no equipo de Cristina Cantero saltaba o Celta Zorka Recalvi á pista en Avilés. Coello repetía por quinta vez consecutiva no quinteto titular, completado con Mariona Martín, Celia García, Rose Marie Julien e Marita Davydova.

Os primeiros puntos do partido foron para o conxunto local, grazas a varios triplos que amezaban ás celestes. Pero estas non tardaron en reaccionar e golpearon ás rivais cun 0-9 que tranquilizaba ás visitantes. Cunha forte defensa, e un ataque fluido, as viguesas mantiñan a distancia coas asturianas. Porén, a ADBA presionaba, obrigando ao Celta a asinar outro parcial 0-6, poñendo o marcador nun 13-22 á fin do primeiro cuarto.

No segundo tempo as distancias reducíanse, coa efectividade das locais que se xogan o seu futuro en cada partido. Pero as celestes mantiñan ao ADBA a raia, dominando o rebote e agotando posesións. Así, as galegas lograron un colchón de dez puntos que facían que os contrataques asturianos non se materializasen nunha ameaza. O tempo de descanso chegou cun 27-40 no electrónico.

Á volta de vestiarios, a narrativa seguiu igual. A defensa do Celta destacou pola súa intensidade. O cadro local non baixaba os brazos e, malia non alcanzar ás galegas, mantiña a distancia duns dez puntos.

Todo cambiou a partir do minuto 25, cando o fol da ADBA era cada vez menor, algo que aproveitarían as celestes. Por se quedaba algunha dúbida sobre quen sería o gañador, o Celta asinou un parcial 2-14 que sentenciaba o encontro.

Así, os dez minutos finais serviron para certificar a xa contundente vitoria. Aproveitando a súa superioridade, Cantero repartiu minutos entre as súas xogadoras, mantendo o mesmo nivel de xogo sobre a pista. Cun 5-11 neste último cuarto, os dous puntos viaxaron a Vigo.

Con esta vitoria, as viguesas aseguran que como mínimo quedarán terceiras na clasificación final do Grupo A e competirán pola fase de ascenso a Liga 1 por terceira vez en catro tempadas.

Angela Coello suma 100 vitorias

O décimo trunfo consecutivo para as celestes deu outro motivo para a celebración. Angela Coello suma xa 100 vitorias coa camiseta do Celta no primeiro equipo en competición oficial.

A baloncestista chegou ao club vigués no 2008, para competir en categoría Minibasket e debutar cinco anos despois na Liga Feminina 2. Tras tres anos nos Estados Unidos, xogando na NCAA á vez que estudaba na Winthrop University, a interior viguesa regresou ao seu club.

As 100 vitorias celestes de Angela Coello / CELTA BALONCESTO

As imaxes do ADBA – Celta Zorka Recalvi

1 de 10

- +