O CBS Cambre estreábase como local en Acea de Ama nesta tempada e o fixo con dobre vitoria ante o Dridma Rivas CD. As galegas impuxéronse por un 7-6 no primeiro partido e cun 5-4 no segundo.
Con estes resultados, o conxunto galego chega á terceira xornada na quinta posición da Spanish Softball League, con 500 AVG, por detrás do Antorcha Valencia (750 AVG) e o Sant Boi, o Rivas e o Viladecans (1000 AVG).
A igualdade reinou no Cambre vs Dridma Rivas
Desde o comezo do primeiro partido da xornada, quedou claro que en Acea de Ama a igualdade ía reinar sobre o campo.
A xornada comezou con dous equipos que buscaban deixar as derrotas da primeira xornada atrás. Cun man a man, os dous equipos loitaron por levarse a vitoria. Finalmente, as galegas imporíanse, cunha actuación destacada da debutante Elisabeth Leonella Fortunata, pitcher internacional e gañadora do Suramericano de sófbol no 2019. A súa velocidade de lanzamento de 65 mph serviu para rematar o partido sumando 12 strikeouts.
Porén, na primeira carreira o Dridma ameazou con impoñerse, cheando bases finalmente sen recompensa. No segundo inning, Cambre aproveitou un erro defensivo das rivais, pero estas lle deron a volta ao marcador cun dobre de Ana Grandes e unha carreira de Saray Valero. As intervencións de Irene Jiménez e Andrea Moreno serviron para poñer o 1-4.
Lonxe de renderse, as locais conseguiron remontar no quinto inning, sacando proveito de dous erros, dous walks e dous hits, un deles dobre de Laura Otero. Co 6-4 chegaba o último tempo.
Con dous wild pitches, o Dridma empatou o resultado, pero as cambresas evitaban que as visitantes se colocasen por diante. Laura Paz chegou á primeira base por bolas, Soengas foi o segundo out do Cambre e Otero tivo na súa man o terceiro, pero un fallo no pase fixo que o terceiro out pasara a primeira e segunda ocupadas. A vitoria chegaría finalmente grazas a un fly polo right que lle permitiu a Paz anotar o inning do trunfo.
Desta forma, o primeiro dos dous duelos que enfrontaron a Cambre e Dridma Rivas decantouse para o bando local, despois dun partido moi rifado. O resultado final foi un 7-5.
Segunda vitoria local traballada
As boas enerxías despois da primeira vitoria da tempada serviron de impulso no segundo encontro da mañá, no que as cambresas tamén lideraron o partido, especialmente da man da pitcher Laura Otero.
Un inicio 0-2 non rematou coas ilusións das galegas, que foron quen de remontar o resultado para manterse por diante ata o final. Os dous primeiros puntos visitantes chegaron da man de Alcántara, mentres que o conxunto local respondía frente a Alba Herrera convertindo dous hits no 4-2, cunha destacada Cabrera.
Mentres, Otero resolveu as complicacións creadas polas madrileñas, ata os minutos finais, cando o Cambre ía gañando por unha, dúas eliminadas, bases cheas e conta completa. O 5-3 chegou primeiro polas ofensivas locais ante Ibone Abruñedo, co single polo short de Morente e máis tarde cun triple de Soengas seguido polo sencillo da pitcher cambresa.
Dridma tivo a súa oportunidade no sexto inning, pero a presión non puido con Otero. A xogadora mantivo o pulso para eliminar á bateadora visitante no último lanzamento do encontro.
Cun novo final de infarto, as galegas controlaron ás madrileñas cando chearon bases con dous outs e un walk a Elenea Hernández. O resultado neste duelo foi un 5-4.
Revive aquí os dous partidos do CBS Cambre:
