Este sábado no marco da sexta xornada da Liga Femenina 2 de baloncesto, dous equipos galegos enfrontaranse. Trátase do CB Arxil e o AD Cortegada, que disputarán no Pabellón CGTD unha nova edición deste derbi este 7 de novembro, ás 19:30 horas. Este partido si estará aberto ao público, malia que con restriccións acordes ás medidas tomadas en Pontevedra, que limitan o aforo a 60 persoas.
Tanto o CB Arxil como a AD Cortegada buscarán neste encontro, de especial relevancia para o baloncesto arousán, alonxarse da parte inferior da táboa na que figuran na undécima e duodécima posición respectivamente; ambos con catro puntos e tan só tres partidos disputados.
As visitantes están a traballar para non pasar por unha situación tan apurada como a vivida na tempada anterior cando, no momento da suspensión da competición o equipo arousán ocupaba a duodécima posición, a tan só un posto do descenso. Coas as derrotas fronte ao Baxi Ferrol e o Celta Zorka a AD Cortegada soamente logrou puntuar grazas a unha vitoria fronte ao Maristas Coruña.
O Cortegada busca despuntar coas incorporacións
As novidades do equipo de Rubén Domínguez, a eslovaca Tereza Sedlakova e a montenegrina Teodora Saric, así como o retorno ás pistas de Sara Gómez están a traballar para mellorar os resultados da tempada anterior. A canterana por excelencia volve ao Cortegada tras finalizar a súa baixa por maternidade e probablemente será fundamental nos planes do adestrador.
O CB Arxil chega a unha semana decisiva
Pola súa banda, os próximos días serán decisivos para as de Maite Méndez. As xogadoras do Arxil tentarán sumar unha vitoria antes dos desprazamentos ante o Rosalía e o Plasencia, e despois de dar unha moi boa imaxe ante o Baxi Ferrol e o Celta Zorka.
Os afeccionados que non podan acudir presencialmente ao encontro (poderanse facer reservas a través do clube anfitrión) teñen a posibilidade de velo no Canal FEB o partido.
