O Maristas Coruña continúa polo bo camiño na competición ligueira na LF2. Na última xornada volveu imporse ao Romakuruma U.E. Mataró por 48-61, sumando así a oitava vitoria do curso, un resultado que mantén ao cadro herculino no máis alto da clasificación estatal. Pola súa banda, no duelo galego entre o CB Arxil e o Mariscos Antón Cortegada, foron as pontevedresas as que levaron o triunfo (77-60). Unha vitoria de gran mérito ao tratarse dun enfrontamento ante un dos conxuntos da parte alta da clasificación, que apunta a certos indicios de mellora nunha tempada especialmente complicada para o equipo da cidade do Lérez.
O Maristas Coruña mantense líder
O Maristas Coruña continúa líder na táboa tras vencer na última xornada en Mataró (48-61).
O conxunto dirixido por Fernando Buendía non afrouxa e afiánzase como líder do campionato tras sumar esta nova vitoria ante o Romakuruma UE Mataró, en campo rival. O cadro herculino acada así o seu oitavo triunfo da tempada, na que sufriu unha única derrota, fronte ao Aceites Abril Abda Sanfer (63-69), nos nove encontros disputados.
Uns resultados que fan que o que resta de curso se presente de cara para as coruñesas, quen se consolidan como principais candidatas a facerse co título ligueiro, sempre que manteñan os bos resultados e o seu alto nivel competitivo.
O Maristas Coruña medirase ao Siroko Gijón Basketballl o vindeiro día 6 de decembro, ás 18:00 horas no Maristas Col. (A Coruña).
Ver esta publicación en Instagram
FICHA TÉCNICA
PARCIAIS: 14-13, 17-19, 8-14, 9-15
EQUIPO ARBITRAL: Lucas Arias Expósito e Jorge Gamiz Álvarez.
INCIDENCIAS: Partido correspondente á novena xornadada LF2, disputado no Pavelló d’Esports Josep Mora (Mataró).
Triunfo significativo do CB Arxil ante a AD Cortegada
O CB Arxil impúxose ao Mariscos Antón Cortegada (77-60) e logrou unha vitoria cómoda no duelo galego que enfrontaba ao ambos equipos. O Cortegada partía como favorito, cun partido aparentemente ao seu alcance, xa que ocupa a parte alta da clasificación, mentres o CB Arxil pelexa por afastarse dos postos de descenso. Porén, o deporte sempre pode sorprender.
O conxunto pontevedrés viase obrigado a reaccionar e cambiar o rumbo dun curso cheo de obstáculos, e así o fixo: deu un golpe sobre a mesa e conseguiu a vitoria fronte a un rival moi complicado. Este triunfo permite ao equipo dirixido por Marina Janeiro escalar á 11ª posición da táboa e sumar a súa terceira vitoria da tempada, un sopro de aire fresco que pode reforzar a moral e o rendemento do cadro da boa vila de cara aos vindeiros encontros.
Pola súa banda, esta derrota non supón grandes problemas para o Cortegada, que se mantén no cuarto posto con seis vitorias e tres derrotas nos nove encontros celebrados ata o de agora.
O Mariscos Antón Cortegada disputará o seu próximo encontro ante o Romakuruma U.E. Mataró, o sábado 6 de decembro ás 19:30 h, no Pabellón Municipal Sara Gómez de Vilagarcía de Arousa.
O CB Arxil medirase ao Robles Lleida o domingo 7 de decembro, as 12:15 h, no Pabellón Barris Nord de Lleida.
Ver esta publicación en Instagram
FICHA TÉCNICA
PARCIAIS: 23-15, 22-17, 10-11 e 22-17
EQUIPO ARBITRAL: Daniel López Illán e Sergio Álvarez González.
INCIDENCIAS: Partido correspondente á novena xornadada LF2, disputado no Pabellón del C.G.T.D. (Ponrevedra).
RESULTADOS DA XORNADA DA LF2. GRUPO B
- ROMAKURUMA U.E. MATARÓ – MARISTAS CORUÑA 48-61
- IBAIZABAL – MMANRESA CBF A -61-49
- SMARTLOG OINNTXE – TALENOM BOET MATARÓ 78-64
- B ARXIL – MARISCOS ANTÓN CORTEGADA 77-60
- ABRIL ABDA SANFER – ROBLES LLEIDA 53-65
- MIPELLETYMAS B.F. LEON – TNG BÀSQUET A 83-76
- SIROKO GIJON BASKETBALL – HORBISA SPIRIT GREENKW BARAKAL (sen disputar)
Ver esta publicación en Instagram
