O Arxil impúxose ao Maristas Coruña por un marcador de 72-61. Este triunfo e a derrota do Ulla Oil Rosalía diante do Celta Zorka Recalvi (46-64) fai que as pontevedresas suban un posto na táboa e se sitúen no lugar 12º na clasificación a costa do Rosalía. Pola súa banda o Maristas pagou coa derrota o seu xogo no último período e mantense na 10ª posición no Grupo A da LF2. Na primeira volta as pontevedresas xa gañaran na Coruña (67-73)
O CB Arxil ten dous partidos pendentes, polo que a súa posibilidade de mellora clasificatoria é maior ca doutros dos seus rivais, incluído o propio Maristas Coruña co que se medía esta xornada.
Coruñesas e pontevedresas disputaron un choque bastante parello até que chegou o último período e as locais endosaron ás visitantes un rotundo parcial de 20-9 que lles outorgou o triunfo ás de Maite Méndez fronte ás de Jorge Carreira.
No primeiro período o Maristas rematou o tempo de xogo por diante 14-18 e a igualdade mandou sobre a pista de xogo do CGTD. No segundo período iniciuse unha reacción no CB Arxil que deu lugar a nun remonte no electrónico. O parcial de 23-14 fixo que as pontevedresas puxeran rumbo a vestiarios cun 37-32 ao seu favor.
A reacción do CB Arxil
Á volta do descanso o Maristas Coruña puxo toda a carne no asador e acadou un 15-20 que volvía a nivelar as opcións literalmente, xa que se iniciou o último período cun 52- 52 no luminoso. A reacción local inclinou a balanza para o Arxil que acadou un rotundo parcial 20-9 e sentenciou nos minutos finais do choque que rematou cun 72-61 para as locais.
O seguinte cruce para o Arxil será visitando a cancha do Celta Zorka Recalvi (5º) en Navia, mentres que ao Maristas Coruña tócalle recibir a visita da AD Cortegada (11º) de Vilagarcía de Arousa.
