O Concello de A Pobra do Caramiñal acollía esta semana a presentación oficial da intensa xornada que esta fin de semana viviremos nese mesmo concello durante a disputa de tres dos máis importantes campionatos de campo a través do ano. Daranse cita 1.200 atletas e celebraranse os campionatos Xunta de Galicia de Menores (“XXV Memorial Alejandro Lorenzo”), Máster’, Sub-16 e Sub-18.
No acto, presidido pola Concelleira de Deportes do Concello de A Pobra do Caramiñal, Genoveva Hermo, polo presidente da Federación Galega de Atletismo, Isidoro Hornillos, así como polo presidente da Asociación de Atletismo e Deportes do Barbanza, José Moure, destacaríase entre outros aspectos, a importancia desta macroxornada que convertirá este domingo, 6 de febreiro, ao concello pobrense na capital do campo a través galego.
Creado este memorial orixinariamente para lembrar a figura de quen fora carismático adestrador e referente do atletismo ourensá fai xa un cuarto de século, Alejandro Lorenzo, co paso dos anos iriase convertindo na proba máis importante de campo a través federado das citadas categorías pola que pasaron os máis significativos especialistas galegos e galegas dos últimos lustros.
Campionato Xunta de Galicia de Menores ¨XXV Memorial Alejandro Lorenzo¨
A xornada arrincará cedo ca celebración do XXV Memorial Alejandro Lorenzo as 10.00 horas, coincidindo ca saída dos máis cativos do noso atletismo, os Sub-10. A posteriori e por quendas irán tomando parte o resto das categorías Sub-12 e Sub-14 ata completar o total de 659 inscritos quenes rematarán esta primeira entrega sobre as 12.10 horas, segundo informa a Federación Galega de Atletismo.
XLIX Campionato Xunta de Galicia campo a través Sub-16 e Sub-18
Practicamente a continuación e logo das categorías base de campo a través, sobre as 12.20 h. arrincará a primeira das carreiras do Campionato Xunta de Galicia Sub-16 e Sub-18 na que están inscritos e inscritas un total de 320 atletas.
A categoría Sub-16 terá en Amparo Corredoira da Atlética Lucense a súa principal aspirante ao título ao igual que na categoría masculina será o lucense do Lucus Caixa Rural, e actual subcampión galego Teo de Frutos, un dos principias aspirantes a ocupar o primeiro posto.
Entre as atletas galegas na categoría Sub-18 a gran favorita e un dos atractivos do campionato é sen dúbidas Xela Martínez da Atlética Lucense quen ven de pulverizar recentemente o récord de España dos 1.500 en pista cuberta e cuxa superioridade é incuestionable hoxe en día a nivel galego e estatal. Aínda que estamos diante dunha atleta moi nova, todo indica que a proxeción da lucense Xela Martínez apunta a unha sólida carreira no campo a través.
Nos atletas masculinos, destaca Ricardo Negrete, trátase dun deportista do Club Ría Ferrol que debuta nesta nova categoría logo de proclamarse o ano pasado campión galego Sub-16. Terá que medirse entre outros a Iván Rego do Lucus Caixa Rural, quen tamén figura nos pronósticos para o título. Abofé que a loita polo podio estará disputada nesta categoría.
XXXIV Campionato Xunta de Galicia Máster
O último dos campionatos deste intenso domingo corresponderá ao Campionato Xunta de Galicia Máster na que tomarán parte máis de dous centos atletas na procura dos distintos podios autonómicos en xogo. En horario inusualmente de tarde, a primeira carreira dará comezo ás 15.50 h. para rematar ca saída da categoría Máster 45 sobre as 17.50 horas
Como xa ocurrira neste mesmo escenario no ano 2020 (no 2021 non se celebrou) tomarán parte entre outros e outras as gañadoras daquela acasión nas súas respectivas categorías Tina Fernández do C.A.Sar, Mar Barcón de La Mochila del Deporte, Manuel Suárez do Veteranos de Samil así como Xosé Luis Otero do C.A.Santiago.
