Na Casa do Concello de Ames tivo lugar a presentación do Campionato Xunta de Galicia de marcha en ruta, que se celebrará o vindeiro domingo 5 de febreiro, no circuíto da travesía do Porto, no parque empresarial Novo Milladoiro.
A este acto acudiron o presidente da Federación Galega de Atletismo, Iván Sanmartín; o alcalde do Concello de Ames, Blas García; a concelleira de Deportes, Susana Señarís; a responsable de promoción de menores e marcha da Federación Galega de Atletismo, Maika Jueguen Lago; o técnico do departamento de Deportes, Alberto Viaño así como Joao Fernández, en representación do club Millaraio e David García do club Ames Atletismo.
Na súa intervención, Iván Sanmartín declarou que para a Federación Galega de Atletismo era “un pracer” estar no Concello de Ames, “presentando este campionato, dunha especialidade que ten moito arraigo en Galicia e tamén a nivel internacional. Ogallá este sexa o berce para que saian máis marchadores de aquí, de Ames”.
Ademais, Iván Sanmartín loubou o traballo dos clubs de atletismo amesáns, destacando que “a marcha en ruta é moi promulgada tanto polo Millaraio como por Ames Atletismo, que son dous clubs que están a desempeñar un magnífico traballo coas súas escolas e potenciando estas especialidades. Eles tamén son responsables de que esta proba se vaia a celebrar aquí o vindeiro domingo 5 de febreiro“.
Ademais, expresou Iván Sanmartín que “unha das intencións que teño como presidente da Federación Galega de Atletismo é montar un circuíto de marcha en ruta, que teña tres ou catro probas en Galicia, e ogallá Ames poida estar nese circuíto”.
A a concelleira de Deportes, Susana Señarís, tamén indicou que “vai ser unha ocasión para ver esta nova modalidade. Todos estamos acostumados ás carreiras habituais e sempre gusta traer novas probas e ver novas modalidades de competición”, e animou “a todas aquelas persoas que se queiran inscribir a facelo. Está toda a información na páxina da Real Federación Galega de Atletismo”.
A rolda de intervencións foi pechada polo alcalde de Ames, Blas García. “Fai uns meses homologamos un circuíto no Milladoiro que inauguramos cunha carreira de milla urbana. Así conseguimos poder diversificar un pouco a disputa de varias probas no concello: por un lado temos o circuíto de Bertamiráns, tamén homologado, agora contamos con este do Milladoiro“, explicou.
O rexedor municipal engadiu tamén que “ese día imos ter 180 atletas federados competindo en diversas categorías de marcha. É un deporte vistoso, unha proba deportiva moi interesante, e animamos a que a veciñanza de Ames, e sobre todo a do Milladoiro, a que aproveite para saír e ver a proba”.
Aberta a inscrición no Campionato Galego de Marcha en ruta
No Campionato Xunta de Galicia de marcha en ruta poderán participar todos aqueles atletas que teñan ficha pola Federación Galega de Atletismo na tempada 2023. O prazo para anotarse xa está aberto, e as inscricións pódense facer a través do sistema online da web da RFEA ata o vindeiro luns, 30 de xaneiro, ás 20:00 horas. O número máximo de corredores por proba será 20, exceptuando a categoría absoluta, na que poderán participar ata 30 persoas. A responsabilidade das inscricións dos atletas, salvo que sexan independentes, corresponderá ao seu club.
Por outra banda, unha vez publicada a listaxe de aceptados, aqueles que o desexen poderán darse de baixa ata as 10:00 horas do mércores 1 de febreiro, informando a través enderezo electrónico competicion@atletismo.gal. Todas as baixas que sexan comunicadas fóra de prazo suporán unha multa de tres euros. Así mesmo, os participantes que se ausenten na proba sen aviso previo ou informando con menos de 48 horas de marxe serán sancionados cunha multa de cinco euros.
Empezan os Sub-12 cun recorrido de 2km
O Campionato Xunta de Galicia de marcha en ruta dará comezo coa proba Sub-12 masculina, que terá un recorrido de dous quilómetros e está programada para as 10:20 horas. Posteriormente, desenvolverase a carreira Sub-12 feminina, ás 10:35 horas, na que tamén se percorrerán dous quilómetros.
Ás 10:50 e ás 11:00 horas será a quenda dos participantes na categoría Sub-10 masculina e feminina, respectivamente, que correrán un quilómetro. Xa ás 11:10 terá lugar a proba Sub-14 masculina, e ás 11:35 a feminina. En ámbalas dúas o percorrido será de tres quilómetros.
Para finalizar, celebraranse as dúas probas mixtas da xornada, a da categoría Sub-16 e a absoluta. A primeira comezará ás 12:00 horas, e os participantes deberán correr cinco quilómetros; mentres que na segunda a sinal de saída darase ás 12:35 horas, e os participantes terán dez quilómetros por diante.
Todos os horarios son provisionais. Unha vez pechado o prazo de anotación e publicadas as listas de admitidos concretaranse as horas de comezo definitivas das probas en función das persoas inscritas en cada categoría.
