O fútbol gaélico galego é un deporte para moitos descoñecido pero continúa coa súa progresión imparable. As Seleccións Galegas seguen conquistando metais de todas as cores ano tras ano e o mundo xa mira con bos ollos a Galicia. Con todo, e por se o palmarés soubese a pouco, o que se aveciña pinta de marabilla. O próximo obxectivo xa está definido: a celebración en Pontevedra do Campionato Europeo de seleccións de fútbol gaélico do 17 a 19 xullo de 2020.
O Campionato Europeo de seleccións é un evento internacional que enfronta ás diferentes seleccións existentes dentro do County Europeo, as cales están formadas por xogadoras/es nativos de cada unha das rexións respresentadas.
Co precedente do Mundial 2019 en Irlanda
Este evento suporá o seguinte gran evento dentro do fútbol gaélico europeo, logo da celebración do Mundial 2019 en Irlanda, o cal supón un reto maiúsculo que viría a afianzar a posición do gaélico galego coma unha das potencias europeas de fútbol gaélico.
Unha competición do máximo nivel no que a Selección Galega feminina ten o reto de defender na casa o título alcanzado en Lorient no ano 2018, mentres que a masculina quere recuperar o trofeo que estivo a piques de gañar tras perder na final contra Francia.
