O velero da VI Travesía do ‘Camiño de Santiago a vela’ chegou este luns á cidade da Coruña. Co obxectivo de visibilizar e poñer en valor o labor das mulleres do mar baixo o lema ‘A muller e o mar’, a embarcación Kais, con Ángela Pumariega, como capitá, saiu de Sada para arribar á Coruña nunha das súas paradas dentro da súa ruta.
A Travesía atópase xa na súa recta final. Despois da Coruña, o equipo chegará a Muxía este mércores, para dirixirse despois a Muros e Pobra do Caramiñal, desde onde seguirán a pé ata Santiago de Compostela pasando por Padrón e Milladoiro. A data de chegada será este mesmo sábado, 19 de xuño.
A bordo do Kais, ademais da medallista olímpica Ángela Pumariega, navegaron a subdirectora xeral de Seguridade, Contaminación e Inspección Marítima da Dirección General de la Marina Mercante, Ana Núñez, e a subdirectora adxunta, Ángela Pazó. Tamén estiveron na embarcaión a presidenta de Portos de Galicia, Susana Lenguas, e outros representantes do Consorcio de Turismo Coruña, da Autoridade Portuaria, e o resto de membros do equipo do ‘Camiño de Santiago a vela’.
⛵ A travesía @sailtheway chegou esta mañá á nosa cidade onde foi recibida, entre outras autoridades, polo presidente do Consorcio de Turismo, @JiBorrego.
Esta navegación a vela, que partiu de Hondarribia o pasado día 4, chegará a Santiago o vindeiro venres#SempreAberta pic.twitter.com/PtYb6ouO4v
— Turismo de A Coruña (@CorunaTurismo) June 14, 2021
Xa en terra celebrouse unha recepción deste grupo de peregrinas por mar, que partiu o pasado día 4 desde Hondarribia. No acto participaron as representantes da DGMM do Ministerio de Transportes, Movilidad y Agenda Urbana, e durante o mesmo presentouse a campaña de verán 2021 “Seguridad en la Náutica de Recreo”, da DGMM e Salvamento Marítimo.
O obxectivo desta campaña non é outro que ofrecer recomendacións para a seguridade e prevención da contaminetación dos navegantes de recreo na tempada estival. Tamén estiveron presentes Carlos Paz, director de Quirónsalud, patrocinador da Travesía, e encargado de instalar un servicio de fisioterapia no porto para os navegantes.
O proxecto detrás do ‘Camiño de Santiago a vela’
O ‘Camiño de Santiago a vela’ é unha iniciativa de peregrinación do Camiño por mar que promove a navegación de recreo da Costa Norte española como alternativa de ocio de calidad, combinada coa cultura e tradición do Norte de España, segundo recolle Rally Sail the way.
Tal e como recalcan desde a organización, esta experiencia de vela cumpre con todas as medidas de seguridade e hixiene segundo o protocolo sanitario para a prevención da COVID-19. As inscricións para formar parte dalgunha destas etapas segue aberta nesta ligazón.
Baixo o lema ‘A muller e o mar’, a edición deste ano de Navega o Camiño coincide co Xacobeo 2021 e ten como meta dar visibilidade á contribución da muller no desenvolvemento do sector marítimo e á gran variedade de profesións existentes relacionadas co mar.
A tripulación do Camiño de Santiago a vela formouse por mulleres profesionais do deporte, a educación, a ciencia, o coaching e a comunicación, coa medallista olímpica Ángela Pumariega como capitá. Pumariega foi ouro olímpico en Londres 2012 coas galegas Sofía Toro e Támara Echegoyen. En cada etapa do camiño acollerá a bordo a diferentes profesionais do sector marítimo, favorecendo sinerxias e proxectos interdiciplinares no camiño á igualdade.
A presente edición desta Travesía está organizada por NorthMarinas, unha entidade da Asociación Nacional de Empresas Náuticas, a organización representativa do sector náutico español. A expedición conta co apoio institucional de Turespaña, Puertos del Estado, EKP, Xunta de Galicia e Portos de Galicia, ademais dos Concellos de Hondarribia, Bermeo, Getxo, Santander, Gijón, Ribadeo, Viveiro, A Coruña, Muxía, Muros, A Pobra do Caramiñal, Vilagarcía de Arousa e Padrón/Milladoiro.
