O CBS Cambre finalizou a primeira fase da competición cunha dobre derrota ante un equipo potente, o CBS Viladecans, segundo clasificado da liga de sófbol de división de honor, a Spanish Softball League. No primeiro encontro, as galegas caeron derrotadas por un 10-0, mentres que no segundo ofreceron unha mellor versión, pero perderon cun 10-4.
As catalás conforman un equipo xa histórico do sófbol nacional, conformado por xogadoras moi potentes (algunhas delas internacionais coa Selección que disputará o Europeo de Italia), que deixaron sen opcións ás cambresas. O club local xogaba coa tranquilidade de estar na cabezaa de grupo, coa súa praza para a Copa da Raíña e para o play off polo título xa aseguradas. Pola contra, o Cambre buscaba sumar para seguir optando ao grupo medio.
Primeiro duelo sen puntos para o Cambre
O primeiro partido finalizou cun 10-0 a favor das locais, que se aproveitaron dunha frouxa defensa galega, cun equipo que cometeu erros impropios do seu nivel. En ataque, o Cambre tampouco foi quen de transformar as carreiras, xa que a gran defensa catalá impedía cada ofensiva contraria.
Malia a gran diferenza no marcador, durante a disputa do partidos ambos equipos lograron sumar tres hits, mellor aproveitados polo Viladecans que os transformou en 10 carreiras. No primeiro turno, o equipo local adiantouse no marcador cun 3.0, ampliando a súa vantaxe ata o 8-0 cun só hit no segundo turno, con Ledezma como a gran protagonista.
Nos tres turnos galegos, o Cambre deixou ás súas corredoras en base. En ataque, o cadro visitante xeraba perigo, pero a feble defensa que mostraron en terras catalás fixo que na parte baixa as locais fixeran o 9-0 para chegar ao 10-0 cun sencillo de Anna Sobrino con Ibone Abruñedo. As cambresas tiñan que anotar no cuarto para seguir dentro do duelo, pero o conxunto catalán eliminou ás tres bateadoras galegas rematando o partido.
Desfruta aquí do primeiro encontro da xornada:
As galegas melloraron no segundo encontro
No segundo duelo, as visitantes melloraron o seu xogo, logrando subir ao marcador ata catro carreiras. Porén, a melloría galega non foi suficiente para dobregar ás catalás do Viladecans, polo que a balanza inclinouse de novo cara o conxunto local.
A primeira metade de xogo estivo máis igualada, aínda que, de novo, o club local golpeu primeiro no marcador, cun 3-0 no primeiro inning cun triplo de Ledezma e un home run de Anna Sobrino. O Cambre intentaba puntuar, pero chocaba sempre coa defensa catalá, á vez que non lograba impedir as tres novas carreiras do Viladecans.
Entón, cando o partido semellaba xa encamiñado e decidido, as xogadoras galegas aproveitaron a súa oportunidade. Os singles de Laura Paz, Sarayd Ramil e Noelia Cortés ademais de dous walks con bases cheas fixeron que o marcador pasase ao 6-4 cando o terceiro inning estaba a rematar.
O Viladecans non quería deixar escapar o partido e obtivo outras tres carreiras no seguinte turno. Julia Sebastián, Laura Paz, Noelia Cortés, Paula Serrano e Beatriz Alonso fixeron que o club local a través de innings, hits e strikeouts aumentase a súa distancia, poñendo xa o definitivo 10-4 no marcador.
Podes revivir aquí o segundo partido:
Tras estes resultados, o CBS Cambre remata na novena posición e xa coñece o que será o seu grupo para a segunda fase. As cambresas enfrontaranse ao OBB Orio, Capitalinos de Gran Canaria e o Miralbueno Zaragoza. Esta fase celebrarase a partires de setembro, debido á celebración ao longo do verán das competicións internacionais suspendidas no 2020 por mor da COVID-19, e nas que competirán as seleccións de España sub18 e absoluta.
