O Calasancias Coruña tiña un reto do máis complicado para a última xornada. As coruñesas visitaban ao líder, o CV Oviedo, firme candidato ao ascenso ao levar un pleno de vitorias. Non foi distinto coas galegas, que non lograron levarse ningún dos sets do encontro (3-0).
Durante os primeiros minutos de partido parecía que o Calasancias podía dar a sorpresa ás asturianas invictas. As visitantes comezaban o encontro cun parcial 3-8, unha vantaxe que lograron manter durante a primeira metade do set.
Pero pouco durou a alegría entre as coruñesas, xa que o Oviedo reorganizou as súas filas e melloraron a liña de recepción. Desta forma, os puntos comezaron a aumentar no casilleiro local, ata lograr deixar a primeira manga en casa, cun 25-21.
Para o seguinte set, as asturianas foron quen de desmontar ás galegas, que non lograban frear ás rivais cun gran acerto desde a liña de saque. O Oviedo non fallaba e seguía aumentando a súa vantaxe á conta do Calasancias Coruña. O 25-15 facía a remontada galega cada vez máis difícil.
As rotacións no banco asturiano permitiron que as locais refrescasen o seu xogo, mentres que as coruñesas tiñan cada vez máis problemas para aguantar o ritmo. As locais seguían anotando sen complicacións e o Calasancias non atopaba o acerto. Desta maneira, tamén o terceiro, e último, set foi para as locais.
Para esta fin de semana, a décimo cuarta xornada da Primera División Femenina de voleibol enfronta ás coruñesas coas ourensás do Aceites Abril, nun duelo o domingo, 31 de xaneiro, ás 12:00 horas.
