Na pasada fin de semana, Valencia acolleu o Campionato de España de pista cuberta máster con protagonismo para o Club Atletismo Sada e Esther Pedrosa entre a representación galega.
Inés Papín, do CA Sada, foi un dos nomes destacados da xornada. A atleta colgouse a medalla de ouro nos 3000m F50, cunha marca de 11:31.17. e quedou en segunda posición nos 15000m F50 cunha marca de 5:15.17.
Así mesmo, Papín tamén resultou campioa no 4x200m F50, coas súas compañeiras de equipo do CA Sada Montserrat Fernández, Lina García e Pilar Barreiro. As galegas impuxéronse ao UA Almería.
O club galego tamén voltou de Valencia coa pratas de Janeiro no lanzamento de peso F40 e os bronces de Barreiro nos 800m F50, Ripoll nos 3.000m F60 e Novais nos 400m F40.
Pola súa parte, o CA Sada Mixto 40 rematou en cuarta posición no 4x200m, cun equipo formado por Concha Novais, Fernando Míguez, Nievez Vázquez e Jacinto Parga.
Esther Pedrosa cólgase dous ouros
A plusmarquista Esther Pedrosa, do Playas Castellón, resultou campioa no 1500m F60, cunha marca de 5:16.19, quedando preto do récord español da proba, establecido por ela mesma nos 5:15. Nesta mesma proba, Ángeles Ripoll, do CA Sada, foi quinta.
Pedrosa tamén subiu ao máis alto do podio nos 3000m F60, cunha marca de 11:10, de novo preto do seu récord estatal, establecido nos 11:08.45. Pola súa banda, Ripoll foi terceira.
Ver esta publicación en Instagram
Os outros éxitos galegos
Por clubs, o Samertolameu sumou dúas pratas femininas, cos éxitos de Salgueiro nos 60mv F50 e Varela nos 60m F70. O Burgas Ourense tamén volveu a casa con dous metais, unha prata de Luz María Domínguez nos 400m F55 e o seu bronce nos 800m F55.
O SG Pontevedra acadou unha prata, conseguida por Helena Rey no lanzamento de peso F45, e o Atlética A Silva un bronce, de María de los Ángeles Rodríguez, nos 400m F60.
Ademais, Soledad Pousa, do Ourense Atletismo, acadou un récord galego F50 nos 3.000 metros marcha, ao acadar unha marca de 18:20.37.
