O atletismo galego máster mantén a dous equipos femininos na máxima categoría nacional para a próxima tempada. O CA Sada e o Samertolameu lograron a permanencia na pasada fin de semana, asegurandose a súa presenza na Primeira División no próximo curso.
Os dous clubs máster acudiron á cita de La Nucía para loitar pola salvación. Enfonte, rivais de alto nivel, do talle do Playas Castellón ou o FC Barcelona.
As galegas competirían sen ningún complexo amosando toda a súa enorme calidade que as levaría a lograr a permanencia dunha maneira moi destacada. O Sada lograba un sensacional cuarto lugar na elite nacional cunha puntuación total de 86 puntos sendo as de Moaña sextas con 76 puntos. Estas posicións permítenlles cumplir a ambas entidades os seus máximos obxectivos para esta tempada.
Case 20 medallas máster galegas
O equipo máster de Sada subliña a xesta conseguida, non só pola permanencia, senón por tela conseguido rozando en puntos o podio. O Barcelona alzouse co bronce con 95 puntos, mentres que a prata foi para o Durango Kirol Taldea, con 98 e o ouro para o Playas de Castellón, con 121.
As sadenses obtiveron un ouro en lanzamento de martelo F45 con Loreto Brea no máis alto do podio. En lanzamento de peso F45, Helena Rey alzouse co ouro, o mesmo que Concha Novais, nos 400 metros valos F40.
En lanzamento de xavelina F70, María Luisa Armesto quedou primeira clasificada, mentres que nos 100 metros, Montserrat Fernández quedou na terceira posición do concurso máster. Na proba de 200 metros, María Nieves Vázquez fíxose coa prata, igual que Inés Papín nos 3.000 metros e Helena Rey no lanzamento de disco F45.
Pola súa banda, o Samertolameu destaca que “non é doado manterse na máxima categoría, pero as nosas atletas o acadaron”. Ademais, o club agradece a colaboración na proba máster de atletas e equipos filiais do LUCUS Caixa Rural, Atletismo Noia e Atletismo Feminino Celta.
O club de Moaña conseguiu un bronce no salto de altura, grazas a María Rosario Sureda, outra terceira posición para Elisabeth Pazo Barreiro no lanzamento de martelo F45 e outra en xavelina F40, con Goretti Díaz. Cristina Estévez tamén se colgou o bronce, nos 2.000 metros obstáculos.
Pola súa parte, a propia Elisabeth Pazo sumou tamén unha prata, desta vez en lanzamento de peso F45. Araceli Salgueiro tamén quedou segunda, na proba dos 80 metros valos, o mesmo que Ángeles Bernárdez no salto de lonxitude e Marta García no triplo salto máster.
Un dos ouros chegou grazas tamén a María de los Ángeles Bernárdez, nos 300 metros valos F50, mentres que outro foi grazas a Marta Sureda, no lanzamento de disco F50 e outro grazas a Yobana Bermúdez en 3.000 metros marcha.
