Esta xornada da Primeira División trouxo un derbi galego para o reencontro da afección co Poio Pescamar e a volta do campión copeiro Pescados Rubén Burela á liga. A cita desenvolveuse coa máxima igualade, entre dous equipos representantes do alto nivel do futsal galego. O partido estivo completamente igualado ata o minuto final, cando as Guerreiras Laranxas adxudicáronse a vitoria cun gol in extremis (0-1).
O derbi entre o Poio e o Burela deixou ver no pavillón da Seca o mellor do fútbol sala galego. Ambos clubs son aspirantes a estar no play-off polo título, coas mariñás mellor posicionadas para conseguilo. Tras esta cita as laranxas sumaron outros tres puntos, perfilándose como unhas das favoritas ao título. Ademais, as Guerreiras sumaron recentemente unha nova Copa da Raíña ao seu palmarés, polo que as xogadoras locais fixéronlles un corredoiro antes de dar comezo ao encontro.
A igualdade reinou na Seca no Poio-Burela
As xogadoras da Mariña comezaron o duelo dominando nas posesións e ocasións durante os primeiros intres, pero enseguida a igualdade reinou sobre a pista, con alternativas para ambas escuadras. O conxunto visitante acusaba o cansancio da competición copeira, mentres que o local non lograba definir as súas ofensivas.
O Poio, aplicado en defensa e concentrado en cada xogada, mantiña a raia a un Burela con opcións de repetir o triplete do curso pasado. Sandra Buzón destacaba nas súas filas, sendo a protagonista das ocasións de perigo.
A pausa chegaría coas táboas dun 0-0 aínda no marcador, sen ocasións claras para ningún dos dous equipos. Os ataques laranxas eran cada vez máis frecuentes, pero Silvia empregouse baixo paos para evitar os goles visitantes.
Xa na segunda metade, o Pescados Rubén Burela comezou a deixar destellos da súa superioridade. O disparo de Cami a pase de Peque e de Leti, recibindo de Ale de Paz coa segunda parte xa iniciada ameazaban a un Poio que aguantaba cada golpe.
Pasado o ecuador desta parte, Ale de Paz tivo a mellor ocasión burelista para adiantar ás súas no electrónico, e tamén Peque e Dany tiveron as súas oportunidades de marcar. O equipo de Manu Cossío optou por seguir concentrado en defensa, aferrándose a manter a súa porta a cero. En ataque o Poio Pescamar non remataba as xogadas con acerto, errando na selección de tiros.
A resistencia do @PoioPescamarfs diante do @burelafs durou 3⃣9⃣:5⃣0⃣. Non foi suficiente.
A conexión entre @CamilaGadeia, @danyafera8 e @pgmota7 deulles a vitoria ás da Mariña nun emocionante final.
Esta foi a acción decisiva👇🔝 pic.twitter.com/d1OLgY5SEZ
— En Xogo tvG2 (@EnXogo_tvG2) May 8, 2021
Xusto antes de que o árbitro pitase o final do encontro, cando parecía que o reparto de puntos era xa inevitable, apareceu Peque, de novo con Dany, para dar os tres puntos ás laranxas. Un gol in extremis a 40 segundos do final decantou o partido para as visitantes, sen que as conserveiras puideras facer nada para evitalo. Nos últimos 10 segundos o Pescados Rubén Burela esgotou o tempo cun xogo de cinco, deixando ao Poio Pescamar tocado e sen opcións.
FICHA TÉCNICA
POIO PESCAMAR: Silvia Aguete, Irene, Luci, Ana Rivera, Dani Sousa – quinteto inicial -. Tamén xogaron Antía, Chiesa, Julia, Clara e Miriam.
PESCADOS RUBÉN BURELA: Sandra Buzón, Dany, Peque, Luísa Mayara, Ale de Paz – quinteto inicial -. Tamén xogaron: Jane, Cami, Bea Mateos, M. Cortés, Elena Aragón e Lara Balseiro.
GOLES: 0-1, minuto 40, Peque.
ARBITRAXE: Vilas López // Menéndez Nistal. Por Poio amarela para Julia (minuto 12). Por Burela amarela para Leti (minuto 18), Bea Mateos (minuto 20), Jane (minuto 24).
INDICENCIAS: Partido correspondente á xornada 6 (segunda fase) de Primeira División Feminina disputado na Seca de Poio. O conxunto de Manu Cossío recibiu ao Pescados Rubén Burela FS con pasillo polo recente título de campión de Copa de S.M. A Raíña, conquistado o domingo pasado en Las Rozas.
