As Guerreiras Laranxas están imparables no arranque desta segunda fase de Liga que hoxe tiña sabor de derbi irmadiño. O Pescados Rubén Burela FS deixou a súa pegada de novo en derbi galego impoñéndose 4-1 ao Poio Pescamar, ao que parece terlle tomada a medida.
As pontevedresas aguantaron ben a primeira parte, chegando ao descanso cun marcador de 1-1. Pero as mariñás volveron á pista máis centradas e gañando en intensidade; a volta de vestiarios outorgoulles a vantaxe de 3-1 en tan só un minuto, que ampliaron a porta baleira na aposta polo xogo de cinco pola que optou Manu Cossío. As laranxas estanse a converter na besta negra das verdibrancas.
O dominio e comodidade iniciais das mariñás derivaron en certas perdas de concentración que provocaron desaxustes perigosos para os intereses locais. O Poio Pescamar plantouse en Vista Alegre desplegando por unha defensa intensa en media pista para ir subindo aos poucos e tentar aproveitar así os erros mariñáns.
O luminoso tivo estrea laranxa, con Dany en xogada de estratexia. aAfalta de 53 segundos para o ecuador do primeiro acto, o saque de esquina de Luísa Mayara a Ale de Paz deu o toque de saída.
O Poio Pescamar recuperouse puxo novamente as táboas no luminoso tres minutos despois precisamente cunha recuperación de Rivera sobre Peque. O marcador mantívose sen cambios na primeira parte. Tras as perfectas aparicións de Sandra Buzón sacando a man por arriba ante a tentativa de Luci e freando a pena máxima de Clara no minuto 17. O Pescados Rubén Burela tampouco puido aproveitar para poñerse por diante. No 18, Peque a punto estivo de dar a sorpresa desde pista laranxa, e no 19 Leti rozou o remate fronte a Caridad na chegada da capitá.
O Burela empezou a segunda parte enchufadísimo
Regresou en avalancha o conxunto local para non deixar escapar nada. En tan só un minuto abriu a fenda ata o 3-1, no 23, coa capitá, Peque, sentenciando un gran contragolpe elaborado polo duo conformado por Jane a Dany, e no 24 de novo con firma da 3 laranxa tras un perfecto entendemento entre Cami e Peque.
Diante desta situación, o técnico visitante, Manu Cossío, decidiu arriscar e ir a por todas no derbi irmandiño do futsalfem e apostou polo xogo de cinco con Irene. A súa valentía no foi recompensada. Moi ao contrario, caeu outro novo tanto para as filas burelitas, de forma inmediata. Foi un 4-1 conseguido por Jozi Oliveira a porta baleira.
Con esa primeira acción, o Poio Pescamar desbotou a opción de seguir xogando con porteira xogadora. Ale de Paz a punto estivo de anotar o quinto tanto para as laranxas no minuto 32 gañando a partida ante a defensa visitante pero evitouno o traveseiro.
Con máis de catro minutos por diante, Irene volveu enfundarse na camiseta de porteira xogadora sen éxito. Aínda dispuxeron as burelistas de dúas de ouro para ampliar a renda, con boa resposta de Caridad, no penalti de Cami e o dobre penalti de Peque.
Aquí tedes os goles do partido entre o @burelafs e o @PoioPescamarfs, coas voces de @PatriciaRJuste e @jdmonteroperol.
Vitoria por 4⃣-1⃣ das laranxas con goles de @danyafera8 (2), @pgmota7 e @Jozi_Oli1. @AnaOxigenada logrou o tanto pontevedrés pic.twitter.com/pL0YQTCRF3
— En Xogo tvG2 (@EnXogo_tvG2) April 3, 2021
FICHA TÉCNICA
PESCADOS RUBÉN BURELA FS: Sandra Buzón, Dany, Peque, Cami e M. Cortés – quinteto inicial -. Tamén xogaron: Ale de Paz, Bea Mateos, Luísa Mayara, Jane, Lara Balseiro e Jozi.
POIO PESCAMAR FS: Caridad, Miriam, Daniella, Luci e Rivera – quinteto inicial -. Tamén xogaron: Antía, Clara, Agostina, Irene e Julia
GOLES: 1-0, minuto 10, Dany; 1-1, minuto 13, Rivera; 2-1, minuto 23, Peque; 3-1, minuto 24, Dany; 4-1, minuto 28, Jozi Oliveira
ÁRBITROS: Menéndez Nistal e Vilas López. Polo Burela viu cartón amarelo as futbolistas Peque (minuto 6) e Dany (minuto 39). Mentres que polo Poio Pescamar recibiron amonestación amarela Antía (minuto 15), Rivera (minuto 37) e Luci (minuto 40).
INCIDENCIAS: Partido correspondente á xornada 2ª da segunda fase de Primeira División Feminina disputado en no Pavillón de Vista Alegre. O Concello de Burela quixo render homenaxe a Luci. Vista Alegre recibiu a antiga burelista e se lle fixo entrega dun detalle conmemorativo do título de Liga conquistado en Málaga coa camiseta das Guerreiras Laranxas. O partido foi transmitido pola web da CRTVG
