As xogadoras do Pescados Rubén Burela continúan imparables no seu camiño cara ao play-off, coa terceira vitoria de tres posibles. O conxunto laranxa conseguiu impoñerse esta sábado nunha das pistas máis complicadas da elite, a de STV Roldán FSF, por un 3-5. Este foi un duelo vencido con traballo e entrega, nunha semana con mingua de efectivos.
Tras o gol madrugador das murcianas, o conxunto galego soubo como reaccionar fronte a un rival moi intenso e combativo, que devolveu o empate no inicio da segunda parte, con 2-2, e non deixou de xerar perigo. As Guerreiras Laranxas demostraron unha vez máis que o equipo segue medrando.
Susto temperán para o Burela
As pupilas de Julio Delgado tiveron que remar contra o electrónico. A iniciativa murciana chegou aos 14 segundos de xogo, cun saque de esquina culminado por Alba Gandía. As Guerreiras responderon ben e despregaron o seu particular bulebule para ir apropiándose do esférico e das ocasións. Ale de Paz asinou o 1-1, no minuto 5, nun córner de Peque materializado pola de Neda sen contemplacións.
Roldán tentou facer fronte ao despregamento burelista cunha defensa alta para incomodar as saídas galegas. Tivo o cadro mariñán os seus mellores minutos en ofensiva despois da medianía do primeiro acto con Lara Balseiro, Bea Mateos e Dany; Ale de Paz a punto estivo de repetir xesta sobre a rede fronte á boa resposta de Cristina cos pés.
O cadro murciano, exemplo de intensidade durante os corenta minutos, suspirou pola vantaxe no minuto 15, nunha tentativa de Lola á que non puido chegar Noelia ao segundo pau, con resposta de vertixe entre Peque e Jane. Antes do descanso, as burelistas atoparon o premio merecido nunha perda de Lola que cazou Dany para cederlla a Leti (minuto 18).
As laranxas asinaron a vitoria na segunda metade
O conxunto de Juan Alcaraz volveu á pista para dar continuidade ao perigo xerado por Andrea antes da bucina, ver portería e poñer táboas, de novo con Alba Gandía (minuto 23), fronte a Jozi, e respondeu Burela con outra boa dose de perigo.
Dany non puido controlar o pase de Peque fronte á rede local pero acto seguido a nedense, Ale de Paz, non errou para selar o terceiro, apoiándose na capitá laranxa. Volveu avisar a 17 burelista en contragolpe. Dispuxeron das mellores as murcianas sobre o ecuador do segundo acto, con Alba Gandía nun disparo afastado cruzado que rozou o pau e Jozi freou a Noelia.
Aproveitou entón o conxunto galego para ampliar distancias con Lara Balseiro en galopada pola banda, mitigada nos seguintes compases por Marta Pelegrín. Tras o perigo protagonizado de novo por Ale de Paz, Roldán apostou por xogo de cinco con máis de tres minutos por diante.
Peque non puido dar máis comodidade ao resultado transformando o penalti tras a falta sobre Ale de Paz, pero pouco despois Jane subiu o quinto nunha gran saída con perfecta definición para aferrarse aos tres puntos.
O Clásico, en Vista Alegre
O Pescados Rubén Burela recibirá a Futsi Atlético Navalcarnero o vindeiro sábado, 17 de abril, no Clásico de Primeira, ás 18.30 horas. Vista Alegre abrirá a taquilla con 50 entradas (15 euros/público xeral e 10 euros/ soci@s sen abono. Imprescindible presentar DNI).
Convocadas co combinado estatal
Ademais, tres Guerreiras Laranxas ( Ale de Paz, Dany e Peque) entraron na convocatoria da seleccionadora estatl Clàudia Pons para a concentración da vermella que terá lugar do domingo 18 ata o xoves 22 de abril.
FICHA TÉCNICA
STV ROLDÁN: Cristina, Alba Gandía, Noelia Montoro, Mariángeles, Ángela – quinteto inicial -. Tamén xogaron: Lola, Marta Pelegrín, Marta, Consuelo, Cristina Sánchez.
PESCADOS RUBÉN BURELA FS: Sandra Buzón, Dany, Peque, Lara Balseiro, Bea Mateos – quinteto inicial -. Tamén xogaron: Ale de Paz, Leti, Jane, Elena Aragón, Jozi Oliveira
GOLES: 1-0, minuto 1, Alba Gandía; 1-1, minuto 5, Ale de Paz; 1-2, minuto 18, M. Cortés; 2-2, minuto 23, Alba Gandía; 2-3, minuto 24, Ale de Paz; 2-4, minuto 35, Lara Balseiro; 3-4, minuto 35, Marta Pelegrín; 3-5, minuto 39, Jane
ÁRBITROS: Hidalgo Marín e Martínez Martínez. Polo Roldán sancionouse con amarela a Marta e a Cristina. Por Burela viron cartón amarelo a futbolista Lara Balseiro e o técnico Julio Delgado.
INCIDENCIAS: Partido correspondente á xornada 3 (segunda fase) de Primeira División disputado no municipal Gabriel Pérez Sánchez.
