O Pescados Rubén Burela estará de aniversario. O 4 de setembro de 2021 celebrarán dúas décadas de éxitos laranxas e, para festexalo, o club renova a súa imaxe cun novo escudo.
O emblema mantén o seu sinal de identidade, conservando todos aqueles elementos que representaron ao equipo ao longo destes 20 anos. Unha imaxe que representa a un club humilde que medrou ata converterse no único con representación masculina e feminina na elite española, engadindo outros novos que representan a toda A Mariña.
O balón de fútbol sala e o Torque de Burela
O novo escudo mantén ao balón de fútbol sala e ao Torque de Burela como elementos principais, representando desta forma “o deporte que amamos e a vila que nos viu nacer”, explican desde a entidade.
O emblema inclúe agora ano de fundación, o 2001, “momento en que comezou este soño ata alcanzar un proxecto de consolidación en Primeira División Masculina e que foi recentemente galardoado co premio a Mellor Club Feminino do Mundo”, nunha etapa que desde o Burela definen como “máxica na que as Guerreiras Laranxas encadean nin máis nin menos 9 títulos consecutivos”.
Tamén se engade unha rosa dos ventos identificando o vento do nordés, un vento que sopra en todas as vilas da Mariña e que “quixemos incluír para que toda a nosa bisbarra se sinta identificada co noso equipo”.
Un poema para o Burela
A Mariña, a paixón polo fútbol sala, a afección, o vento do nordés… protagonizan o vídeo de presentación da nova imaxe do Pescados Rubén Burela FS, a través dun poema do escritor galego Antón Cortizas Amado, galardoado cos premios Merlín (2001) e O Barco de Vapor (1988, 1991, 1995). Desde a entidade agradécenlle ao autor “a súa colaboración e disposición por facer desta presentación algo moi especial”.
Polas xanelas da bela Mariña
entran os folgos dun claro nordés
con vinte soños cargados de aromas,
vinte lembranzas encol do convés.
Coa vista alegre que engalana os ollos
chegan os barcos após da faína,
brillan no ceo os trilos da aurora
dando comezo a unha nova partida.
Miles de estrelas no ceo marchando,
paso a pasiño, caneando a luz,
que o novo xogo vai dar xa comezo
cando no porto se apague o run-run.
Pés mariñeiros ao vaivén das ondas
buscan a bóla para canear,
ires e vires da maré máis longa
e as grandes vagas co pé rexeitar.
Imos avante ao son do nordés
que enche a contorna color da súa voz,
rosa dos ventos na pista de xogo,
todo está pronto para o eco dun gol.
Que soe o chifre, xa temos balón,
no alto do ceo comeza a brillar;
dun punteirolo a bóla reloce
brincando escumas no campo de sal.
Sobre as bancadas a amante afección
erguendo o leme, lanzando o bourel,
canta cos ollos ao son dos despexes
para as galernas conseguir vencer.
Os avecíos das aves veciñas
xuntan o alento e chían de vez,
aturuxando de amor á Mariña:
Rosa dos ventos xa vai florecer!
– Antón Cortizas Amado –
Aquí podes desfrutar da presentación:
