O Pescados Rubén Burela confía no seu plantel gañador e renova a tres futbolistas. Cami, Dany e Elena Aragón seguirán unha tempada máis en Vista Alegre como Guerreiras Laranxas.
No caso da internacional brasileira Camila Gadeia Silva, esta cumprirá a súa quinta campaña na Mariña. A peche, de 31 anos, amosouse moi ilusionada por seguir formando parte do proxecto do Pescados Rubén Burela FS para 2021-22: “Estou moi contenta, disposta a seguir dando o mellor de min e axudar o equipo. Quero continuar facendo historia en Burela, que xa é a miña casa”, declarou.
Tal e como informa o seu club, despois de dúas tempadas defendendo a elástica laranxa, Cami regresou ao conxunto galego no mercado de inverno de 2020 tras conquistar a Copa América con Brasil.
Cami: “Teño moitas ganas de volver xa pisar a pista de Vista Alegre”
Nos últimos días de vacacións no seu país, o eterno sorriso das Guerreiras confesa as súas ganas de retomar a actividade e a emoción do futsal: “Teño moitas ganas de volver xa pisar a pista de Vista Alegre. Espero que volva ser unha gran tempada, mesmo mellor que a pasada”.
Tamén seguirá como laranxa a pivote hispano-brasileira Daniela Domingos, quen renova o seu compromiso con Pescados Rubén Burela FS para a próxima tempada na que será nin máis nin menos que a oitava defendendo o 3 laranxa.
Dany: “Este equipo ensinoume a ter éxito, a mellorar como persoa e a ser unha gran xogadora”
“Este equipo ensinoume a ter éxito, a mellorar como persoa e a ser unha gran xogadora. Pescados Rubén Burela FS é a miña segunda pel; é un club que fixo moito por min; co meu traballo tento devolver cada día toda esa confianza”, asegurou.
O Pescados Rubén Burela FS estreará 2021-22 coa bitola de campión de todo e co reto de máximo manterse no máis alto, co 18 de setembro como punto de partida.
Respecto ao plantel que se está a configurar na mariña, a xogadora afirmou que “estamos a reforzarnos moi ben, con xogadoras de grandísima calidade, que destacaron nos seus equipos de procedencia. Tamén poderemos contar co regreso de xogadoras de grandísimo nivel individual que estiveron lesionadas. Con esta base, o equipo seguirá a liña destas dúas últimas tempadas, de ir a por todos os títulos, de conquistalo todo. Queremos que a afección siga gozando co noso fútbol sala e que o nome de Pescados Rubén e Burela siga brillando nas noticias de referencia neste deporte”.
Dany: “Queremos que a afección siga gozando co noso fútbol sala e que o nome de Pescados Rubén e Burela siga brillando”
Aos seus 37 anos, a internacional española afronta esta oitava tempada coma se fose a primeira, nun dos seus mellores momentos: “A miña forma de pensar é a do primeiro día: traballar, adestrar e sempre respectando a compañeiras e rivais, tendo moi presente que nada está gañado de antemán. Traballo, constancia e determinación, esa é a base, sempre con moita humildade, sen crer ser mellor que ninguén”, así é Dany.
Por último, Elena Aragón tamén seguirá no vestiario laranxa. A gaditana acaba de reafirmar o compromiso para 2021-22 e convértese na cuarta renovación do Pescados Rubén Burela.
A ala-pivote de 25 anos afronta a súa segunda tempada na Mariña con ganas de seguir medrando e sumar presenza nas rotacións: “Foi unha campaña excepcional non só polos títulos conseguidos senón pola evolución que experimentou o equipo ao longo da tempada; soubemos sobrepoñernos a todas as adversidades, tanto polas lesións coma polo Covid. O máis importante foi a fortaleza de grupo demostrada na recta final. Persoalmente foi un ano duro respecto aos minutos de participación, pero tamén foi un ano de moita aprendizaxe. Isto fai que teña aínda máis ganas de comezar unha nova tempada”.
Elena Aragón: “Foi unha campaña excepcional non só polos títulos conseguidos senón pola evolución que experimentou o equipo”
“Preséntase de novo un ano moi bonito, con moitas competicións por diante. Este equipo ten que seguir loitando por todo, despregando o seu xogo e gozando sobre a pista, pero o máis importante, tamén facendo gozar a afección. A ver se esta tempada as condicións no lo permiten” verbalizaba así a 19 burelista a súa grande ilusión polo novo reto das Guerreiras Laranxas.
Con estas tres renovacións, a de Sandra Buzón e a chegada das internacionais españolas Irene Samper e Elenita, ademais da continuación de Ale de Paz, Leti, Jenny e Cilene, as Guerreiras Laranxas teñen guerra para rato.
