O Pescados Rubén Burela FS afronta este sábado, 6 de marzo, un duelo contra o colista, o Xaloc Alacant, no que queren reafirmar o seu poderío no Grupo B. O partido celebrarase ás 19:15 horas, e será a previa a un tramo final competido.
Bea Mateos, unha das capitás burelistas, declaraba que no equipo “estamos con ilusión e moitas ganas. Coa mente posta en chegar o mellor posible a esa segunda fase”.
As Guerreiras Laranxas reinan na clasificación ocupando a primeira praza con 31 puntos. No extremo contrario, con só un punto, están as locais, o Xaloc.
Antesala do sprint final do Burela
A primeira fase da Primeira División está a piques de rematar. Esta 17ª xornada é a penúltima no calendario, pero o conxunto galego aínda ten que disputar varios partidos adiados.
En menos de dez días, as laranxas xogarán contra as súas perseguidoras máis inmediatas: Melilla, terceiras con 29 puntos, o sábado 13; Alcorcón, segundas con 29 puntos, o venres 19; e Móstoles, cuartas con 26 puntos, o domingo 21.
Bea Mateos: “Iremos alí a gañar e reforxarnos no noso traballo”
No conxunto da Mariña “só vale gañar”, afirma a 14 laranxa. Malia enfrontarse a un equipo moi necesitado de puntos para esquivar o descenso, o Burela quere seguir sumando de tres en tres así que “iremos alí a gañar e reforzarnos no noso traballo”, concluía a ala-peche.
A activación do protocolo COVID quedou nun susto
Na pasada fin de semana o Burela non competiu xa que se viu obrigado a activar os protocolos preventivos da COVID. Parte do grupo non puido volver ás sesións de traballo debido a un contacto estreito cun caso positivo, polo que se adiou o encontro ante o Majadahonda.
Bea Mateos: “Volvemos coller ritmo”
Polo de agora, non hai unha nova data confirmada, pero o contacto das laranxas qeudou nun susto. “Todas estamos ben e xa puidemos adestrar xuntas desde o luns. Volvemos coller ritmo”, aseguraba Bea Mateos.
A convocatoria das laranxas
Esta é a lista de xogadoras coas que contará Julio Delgado, coa notable ausencia de Peque por molestias nun xeonllo:
- 1. Jozi
- 3. Dany
- 4. Sandra Buzón
- 8. Cami
- 10. Lara Balseiro
- 11. Jane
- 12. Luísa Mayara
- 14. Bea Mateos
- 17. Ale de Paz
- 19. Elena Aragón
- 21. M. Cortés
| Conocemos las 11 #GuerreirasLaranxas que disputarán mañana el encuentro de la jornada 17 de Primera #RFEF @XalocAlacant.
⏰. horas#Burela #Futsal #SomosFutsal #FutsalHeart
— Pescados Rubén Burela FS (@burelafs) March 5, 2021
A principal novidade na convocatoria é a ala brasileira Luísa Mayara, que poderá debutar a domicilio contra o Xaloc.
Luísa Mayara, a nova incorporación do Burela, estará dispoñible para o partido do Xaloc
