O clásico do futsal español xogábase en Vista Alegre pero os tres puntos non quedaron en casa. Un Pescados Rubén Burela curto en ataque caeu derrotado ante o Futsi Atlético Navalcarnero, cun 1-2 final. Con este resultado, as da Mariña sufren a primeira derrota da tempada, nun duelo coa seleccionadora Pons na bancada.
“Xeramos poucas ocasións de gol e no aspecto defensivo respectámolas demasiado. Na segunda parte fomos un pouco máis a por elas, pero quedo coa sensación de que puidemos facer algo máis. Os dous chegamos ben ao play off, con bo colchón. Este era máis un partido de orgullo, despois de moito tempo sen enfrontarnos”, explicaba Julio Delgado, adestrador laranxa, á fin do derbi.
Julio Delgado: “Xeramos poucas ocasións de gol e no aspecto defensivo respectámolas demasiado”
Despois de case ano e medio sen medirse, o Futsi Atlético Navalcarnero leva os tres puntos da xornada 4 ª desta segunda fase na máxima categoría do fútbol sala feminino estatal. Foi este un partido no que faltou ritmo e velocidade e, nesta tónica de xogo, as visitantes estiveron máis cómodas.
O Futsi soubo poñer contra as cordas ao Burela
As madrileñas souberon como sacar rendibilidade ao contragolpe para adiantarse no minuto 6, con Irene Córdoba apoiada en Ari. Merodearon a rede de Belén de Uña Jane e Luísa Mayara sen éxito.
Tras a boa intervención de Jozi Oliveira, fronte a Lora nunha nova transición, o Pescados Rubén Burela gañou en perigo. A punto estivo de ver o empate Peque, no minuto 12, nunha perda de Ju Delgado que soubo como cazar Elena Aragón, cunha excelente resposta da meta madrileña.
No minuto 17, as de Julio Delgado tamén fixeron méritos para igualar a contenda; Ale de Paz non puido chegar ao balón cruzado de Jane e segundos despois Peque acariñou o esférico ao segundo pau en pase da de Neda. Soou a bucina en Vista Alegre con nova ofensiva local entre Ale, Dany e Peque que liquidou a defensa visitante.
Cami igualou a contenda no 29 cun disparo raso afastado que chegou a tocar Marta Balbuena, custodiando a rede na rede na segunda parte, aínda que se escapou para entrar rozando o pau. Volveu adiantarse o Futsi con Ame Romero, que tan só tivo que empuxar fronte a Jozi o lanzamento de Ju Delgado (minuto 35).
Respondeu inmediatamente o Pescados Rubén Burela co selo de Jane en recuperación cunha moi envelenada ante a que tivo que sacar a man Marta Balbuena. Con case catro minutos por diante, Bea Mateos liderou o xogo de cinco pero sen atopar recompensa que rozou Peque a catro segundos da bucina.
FICHA TÉCNICA
PESCADOS RUBÉN BURELA FS: Jozi Oliveira, Dany, Peque, Bea Mateos, Ale de Paz, – cinco inicial-. Tamén xogaron: M. Cortés, Jane, Luísa Mayara, Lara Balseiro, Cami, Elena Aragón.
FUTSI ATLÉTICO NAVALCARNERO: Belén de Uña, Ari, Leti, Ju Delgado, Ame Romero, -cinco inicial-. Tamén xogaron Irene Córdoba, Anita Luján, Lora, María Sanz, Becha, Marta Balbuena, Laura Córdoba.
GOLES: 0-1, minuto 6, Irene Córdoba; 1-1, minuto 29, Cami; 1-2, minuto 35, Ame Romero.
ÁRBITROS: Ferrero Carballal // Martínez Torres. Por Burela amarela para Bea Mateos (minuto 12), Peque (minuto 15), Jane (minuto 16). Por Futsi amarela para Ari (minuto 7), María Sanz (minuto 10), Irene Córdoba (minuto 27)
INCIDENCIAS: Partido correspondente á xornada 4 ª da segunda fase da competición na Primeira División fo Fútbol Sala Feminino da RFEF disputado no municipal Vista Alegre de Burela. O encontro, considerado o clásico do futsalfem, contou coa presenza nas bancadas da seleccionadora nacional de fútbol sala feminino Clàudia Pons.
