Só podía quedar un galego na final a oito da Copa da Raíña e o Pescados Rubén Burela foi o claro vencedor ante o Ourense Envialia. O duelo galego de cuartos de final rematou nun 9-2 a favor das laranxas, que pasan así á semifinal.
As Guerreiras Laranxas impuxéronse con facilidade ao equipo dirixido por Morenín, que viaxaba a Las Rozas coas dificultades propias de baixas importantes como Sara Moreno ou Marta.
O guion do duelo galego non muda en cuartos de Copa
Co partido ligueiro entre Burela e Envialia tan recente na retina (foi xogado o sábado 24 de abril), era de esperar que os cuartos de Copa seguiran un guion similar. Finalmente así foi, cun conxunto laranxa que demostrou a súa pegada a base de goles.
O conxunto que actuou como local, as Guerreiras Laranxas, foi o claro protagonista no dominio e a posesión. Dous minutos bastaron para o primeiro aviso das burelistas, nunha acción na que Jenny Lores freou a Cami e Vane tivo que intervir para paralizar a Luísa.
As oportunidades non deixaban de chegar no bando do Burela, cunha ocasión clara de Peque e unha case asistencia súa a Luísa, que non foi quen de rematar o pase.
Pola súa banda, o Envialia concentraba os seus esforzos nas defensas aproveitando as escasas ocasións que se lle presentaban. A primeira non tardou en chegar. No minuto cinco, Laura Uña realizou un disparo cruzado sen sorte.
O marcador abriríase no minuto 9, con Cami finalizando ao segundo pao unha perfecta triangulación con Jane e Ale de Paz. Aos poucos minutos, Iria Saeta foi quen de volver a colocar as táboas no marcador, tras un pase de ouro de Jenny Lores.
En menos de trinta segundos, o Burela demostrou porque é o vixente campión da Copa. As da Mariña volveron inclinar a balanza ao seu favor cun tanto de Luísa Mayara despois dun rexeitamento ao disparo de Dany.
A hispano-brasileira forzou unha perda ourensá para que Peque asistira a Ale de Paz ampliando a renda laranxa. No minuto 14, o electrónico xa marcaba o 3-1.
A brecha aumentaría ata o 4-1 antes do descanso. Nesta ocasión, Jane aproveitou a recuperación fronte a Carmen na zona de finalización para anotar o cuarto gol lucense.
Despois da pausa, o partido mantivo o mesmo ritmo. A segunda metade produciuse sen sorpresas, cun Burela incontrolable para o Ourense Envialia.
O quinto gol laranxa foi obra de Dany tras un contragolpe, superando a Vane nun man a man. Co 5-1 en contra e 24 minutos xa disputados, Morenín apostaba polo xogo de cinco para dalo todo na eliminatoria.
Este cambio de sistema non afectou ás laranxas, que seguiron dominando na pista gris. As Guerreiras seguían puntuando, con Bea Mateos no 26 e Peque no 28, asinando un irremontable 7-1.
As ourensás non atopaban a fórmula para controlar a un Burela que ía a polo oitavo gol. Este chegou con Jane a pase longo de Jozi Oliveira no minuto 32. O Envialia demostrou unha actitude impecable e malia ter pé e medio fóra da Copa seguiu loitando cada balón.
Así chegaría o premio para as de Morenín, que anotaron o segundo tanto da mañá, de novo grazas a Iria Saeta, cun disparo afastado. No bando contrario, lonxe de conformarse coa vitoria xa conseguida, o Burela apurou o noveno gol que chegaría nun contraataque da man de Peque e Bea Mateos.
📺 RESUMEN | Copa de S.M. la Reina de Fútbol Sala 2021.
⚽ Cuartos de Final | @burelafs 🆚 @OUenvialiaFSF (9-2)#CopaDeLaReinaFutsal 🏆 pic.twitter.com/fcVcFr7NMn
— RFEF Futsal (@SomosFutsal) April 30, 2021
Con este resultado final 9-2, o Ourense Envilia queda eliminado da Copa da Raíña. O Pescados Rubén Burela pasa de fase para xogar o clásico ante o Futsi Atlético Navalcarnero na semifinal.
Clásico do futsal feminino para a semifinal da Copa da Raíña
FICHA TÉCNICA
PESCADOS RUBÉN BURELA: Sandra Buzón, Dany, Peque, Cami e Luísa Mayara – quinteto inicial-. Tamén xogaron Jane, Ale de Paz, Bea Mateos, M. Cortés, Elena Aragón, Lara Balseiro e Jozi Oliveira.
OURENSE ENVIALIA: Vane, Chiky, Laura Uña, Ju e Jenny Lores – quinteto inicial- Tamén xogaron Iria Saeta, Meri, Carmen Carballada e Susana.
GOLES: 1-0, (min.9, Cami); 1-1, (min.12, Iria Saeta); 2-1, (min.13, Luísa Mayara); 3-1, (min.14, Ale de Paz); 4-1, (min.16, Jane); 5-1, (min.24, Dany); 6-1, (min.26, Bea Mateos); 7-1, (min.28, Peque); 8-1, (min.32, Jane); 8-2, (min.32, Iria Saeta); 9-2, (min.37, Peque).
ÁRBITRAS: Sara Gutiérrez, Jorge González e Lidya Guillem. Por Burela amarela para Jane (minuto 38).
INCIDENCIAS: Partido de apertura de cuartos de final de Copa de S.M. La Reina (Las Rozas, 30 de abril-2 de maio) emitido en directo por Teledeporte. Minuto de silencio inicial por el fallecimiento de Javier Encinar, médico da Selección Española de Fútbol Sala.
