O Pescados Rubén Burela FS pecha a semana de dobre compromiso en terras mañas repetindo portería a cero e vitoria, a décima das Guerreiras Laranxas, para reafirmarse no liderado do SubGrupo B da Primeira División do fútbol sala feminino da RFEF.
Fronte a Sala Zaragoza, o conxunto adestrado polo dúo conformado por Julio Delgado e Lucas saíu moi concentrado, para asestar o primeiro axiña, xa no minuto 3, dar vida ao comezo e encamiñar moi ben o marcador.
Así con 0-3 ao descanso e gran seriedade en defensa na recta final con xogo de cinco local, a escuadra mariñá atopou o 0-4 con Peque nos últimos compases.
A Ale de Paz abriu a lata para o Pescados Rubén Burela xa no minuto 3 de partido. Foi cun pase de Camila tras o rexeite fronte á tentativa de Lara Balseiro. Peque, máis dosificada nesta cita aínda que coa mesma chispa de sempre, avisou no 8 estrelándoa contra o pau, para subir o segundo a escasos segundos. A 7 do Burela sentenciou a súa propia recuperación despois do apoio en Bea e Elena.
O 0-3 materializouse no luminoso con tinguiduras cento por cento mariñás, nun pase longo de Lara con propia de Laura Boix, a seis para o descanso.
Tras a boa actuacion da cancerbeira burelista Jozi por partida dobre, no minuto 27 para manter a salvo a renda galega, as Guerreiras Laranxas a punto estiveron de asinar o cuarto, primeiro con Lara ao pau e despois con Ale de Paz.
O segundo de Peque, o cuarto para o Burela
Volveu poñer o perigo o cadro local aínda que escaso, rozando a medianía do segundo acto, con Paola. Con catro minutos por diante, o Sala Zaragoza apostou por xogo de cinco, pero Peque soubo como aproveitar o 39 para anotar por fin o definitivo 0-4 nun roubo, pechando a semana con pleno de triunfos.
FICHA TÉCNICA
SALA ZARAGOZA FS: Suzan, Livia, Rapha, Carmen e Boix – quinteto inicial -. Tamén xogaron: Jennifer Souza, Paola, Rafinha e Sara.
PESCADOS RUBÉN BURELA FS: Sandra Buzón, Dany, Cami, Lara Balseiro e Ale de Paz – quinteto inicial -. Tamén xogaron: tamén xogaron Bea Mateos, Jane, Elena Aragón, Peque e Jozi.
GOLES: 0-1, minuto 3, Ale de Paz; 0-2, minuto 8, Peque; 0-3, minuto 14, Lara Balseiro (p.p. Laura Boix); 0-4, minuto 39, Peque
ÁRBITROS: colexiados Esteban Tirado e Santos Fernández. Amonestaron polo Zaragoza con cartón amarelo a Rafinha no minuto 25. Mentres que nas filas do Pescados Rubén Burela amosaron cartón amarelo ás futbolistas Bea Mateos (minuto 24) e Peque (minuto 24).
INCIDENCIAS: Partido correspondente á xornada 15 de Primeira División Feminina disputado no Siglo XXI de Zaragoza.
