O Pescados Rubén Burela xa vai camiño do seu próximo destino para seguir facendo historia. Esta fin de semana saltará ao Jorge Garbajosa de Torrejón de Ardoz con STV Roldán FSF como o primeiro escollo mariñán dos play-off polo título de liga 2020-21, perseguindo o noveno título consecutivo para o bloque mariñán das Guerreiras Laranxas. A cita de mañá, como segunda semifinal, arrincará ás 13.30 horas e poderá seguirse en directo polas canles da Real Federación Española de Fútbol (RFEF).
“Foron dez meses de moito traballo, o equipo soubo estar ao cento por cento a pesar desta tempada tan atípica. Aínda que non nos gusta moito este formato de xogalo todo en 48 horas, estamos mentalmente preparadas e imos ir a por todo” explicaba Peque, capitá dun bloque que desde xuño de 2019, coa I Copa de S.M. A Raíña, está imparable.
Desde entón locen na vitrina laranxa o 4 Nations Futsal Milán 2019, Supercopa de España Las Rozas 2019, Liga 2019-20, Copa da Raíña Málaga 2020, Supercopa Burela 2021, Copa da Raíña Las Rozas 2021 e XIV Copa Galicia.
A cuarta liga do Burela está á volta da esquina
Agora toca un novo desafío. Está en xogo a que podería converterse na cuarta liga para as Guerreiras. Despois de finalizar en segunda posición, terán o terceiro clasificado, STV Roldán, como rival en semifinais.
Peque: “Vai ser un partido bonito para o espectador e diferente ao que pode verse nun encontro habitual de liga”
Esta será a terceira vez que as mariñás se midan ás murcianas, coas dúas citas da fase 2 para as laranxas (3-5 e 5-2), un rival que a 7 burelista encomia pola súa mocidade, equilibrio de roles e sobre todo intensidade: “A min persoalmente gústame moito. Ten un cadro moi amplo e moi novo, xogan todas e imprimen un nivel altísimo en intensidade. Vai ser un partido bonito para o espectador e diferente ao que pode verse nun encontro habitual de liga”.
O outro billete para a gran pugna (domingo, 16.00 horas) decidirase antes, ás 11.00 horas, entre o líder, Futsi Atlético Navalcarnero, e o cuarto, AD Alcorcón FSF: “Será un derbi madrileño de dous equipos que se coñecen moi ben e creo tamén vai ser moi espectacular”, valoraba Peque, destacando a emoción do grande evento que acollerá esta fin de semana Torrejón, portando con orgullo e responsabilidade un dos carteis de favorito: “Estamos nunha boa dinámica e unha dos nosos sinais, sen dúbida, é a ambición. Non pensamos no que gañamos senón no que temos por diante e é un título de liga. É unha alegría para toda España contar cun evento así con público numeroso; aos poucos a situación vai mellorando. Contar coa afección é unha motivación extra para nós”.
Peque: “Non pensamos no que gañamos senón no que temos por diante e é un título de liga”
A complicada tempada 2020-21 chega ao seu fin e as Guerreiras do Pescados Rubén Burela queren facelo como mellor saben: “Espero que sexa unha semana de felicidade, de traer e celebrar un novo triunfo. Oxalá poidamos seguir celebrando e agrandando esta Historia”, advertía a madrileña xa case de adopción mariñá.
✍️ | -. ́
En juego, 9⃣ título consecutivo, 4⃣ Liga
️ @pgmota7:” @RoldanFSF tiene una plantilla muy amplia y muy joven, juegan todas e imprimen un nivel altísimo en intensidad”#Burela #Futsal #SomosFutsal pic.twitter.com/E1QTNu0RqR
— Pescados Rubén Burela FS (@burelafs) June 11, 2021
A convocatoria das Guerreiras Laranxas
Para este importantísimo duelo, o adestrador do conxunto galego do Pescados Rubén Burela, Julio Delgado, contará coas seguintes futbolistas do seu plantel na convocatoria:
- 1. Jozi Oliveira
- 3. Dany
- 4. Sandra Buzón
- 7. Peque
- 8. Cami
- 10. Lara Balseiro
- 11. Jane
- 12. Luísa Mayara
- 14. Bea Mateos
- 17. Ale de Pa
- 19. Elena Aragón
- 21. M. Cortés
