Burela (2º) e Poio (4º) estrearon a segunda volta esta tarde no regreso da liga no pavillón de A Seca. As Guerreiras laranxas leváronse o derbi irmandiño e distancia xa en 11 puntos ao conxunto conserveiro. Logo dunha primeira parte moi igualada que se foi ao tempo de lecer con empate a dous no electrónico, as lucenses conseguiron tomar vantaxe nos minutos finais da segunda parte.
O duelo galego comezou con moitas ganas de gol. Á tentativa de Dani Sousa xa no minuto 2, respondeu Peque cun potente disparo que se estrelou contra a escuadra. O 5 de xogo cumpriuse con novas oportunidades por ambas as filas. Primeiro cunha oportunidade de Irene sobre a rede de Ana Romero e despois, Luci a punto estivo de estrear o luminoso, de cabeza, tras unha vaselina de Peque.
Tras este reparto de golpes entre ambos conxuntos galegos, chegaba a estrea no marcador cun gol de Ana Escribano no minuto 6. As mariñás tiveron que esperar ata o 15 para devolver táboas, grazas á ex do Poio, Jenny Lores. O partido tomábase un respiro e ambas as escuadras pugnaban por facerse co mango do xogo.
O Poio complicábase o curso do partido cometendo a súa cuarta falta a máis de 8 minutos para a conclusión do primeiro acto. Con todo, pouco tardou o conxunto local en adiantarse, cunha volea de Carol. A falta de minuto e medio para o descanso, Cilene recuperou o empate, a pase de Dany, logo de atopar o oco necesario entre a defensa pontevedresa.
Unha segunda parte de cor laranxa
Tras o tira e afrouxa do marcador na primeira parte, o Pescados Rubén Burela soubo como apropiarse dos tres puntos. A capitá, Bea Mateos, puxo a vantaxe no derbi aos sete minutos do reinicio. Tras o 2-4, de Lara Balseiro, as locais optaron por xogo de cinco. Restaban case dez minutos e conseguiron reducir no 33, con Dani Sousa, a pase de Iria Saeta. Con case catro minutos por diante, o Burela subiu a quinta falta.
A menos de dous da conclusión, Jozi desde cancha propia e a porta baleira levaba a tranquilidade ás burelenses, que acabaron levándose os tres puntos en liza.
FICHA TÉCNICA
POIO PESCAMAR: Caridad, Dani Sousa, Miriam, Irene, Clara cinco inicial; tamén xogaron Carol, Ana Escribano, Ana Rivera, Iria Saeta
PESCADOS RUBÉN BURELA: Ana Romero, Cilene, Peque, Ale de Paz, Jenny Lores, cinco inicial; tamén xogaron Bea Mateo, Dany, Luci, Cristina, Jenny, Lara Balseiro
GOLES: 1-0, minuto 6, Ana Escribano; 1-1, minuto 15, Jenny Lores; 2-1, minuto 15, Carol; 2-2, minuto 19, Cilene; 2-3, minuto 27, Bea Mateos; 2-4, minuto 31, Lara Balseiro; 3-4, minuto 33, Dani Sousa; 3-5, minuto 39, Jozi
COLEXIADAS: Carreira Romero // Vilas López. Por Poio amarela a Silvia (minuto 15). Por Burela amarela a Jenny (minuto 27)
INCIDENCIAS: Partido correspondente á xornada 16 de Primeira Feminina disputado na Seca.
