Estamos en plena conta a trás para o debut ligueiro dos conxuntos galegos do futsal no curso 2020-21. Entre os clubs de Primera División Femenina que están coa mente posta nese reto está o Pescados Rubén Burela. As Guerreiras contarán un ano máis cun corpo técnico-médico que traballará cóbado con cóbado coas xogadoras para acadar novos títulos, tal e como veñen facendo nas últimas tempadas. A entidade da Mariña quere pór en valor o seu inestimable traballo a prol dos éxitos do equipo.
Semana de estrea. As campioas de liga comezarán o periplo da nova tempada 2020-21 esta semana. Será o sábado ás 18.00 horas na pista do Alcorcón FSF, despois de máis de dous meses de pretempada ás ordes dun corpo técnico-médico que é un elemento máis á hora de acadar títulos.
Baixo a batuta dun tándem perfecto, conformado por Julio Delgado e Lucas, continuarán traballando man a man Emma Losada, como delegada, Pablo Díaz, na preparación e readaptación física, e Fran Paz, como adestrador de portería.
Este ano, David Mariña asumirá por segunda tempada os apartados de fisioterapia e PNI, co apoio da enfermeira Natalia Fernández e o masaxista Xurxo Rodríguez, ademais da colaboración de L2 Fisioterapia.
Da alimentación coidará a nutricionista Alba Vila, mentres que o servizo médico volverá estar supervisado por Javier Couce, co podólogo Miguel Murias.