A ala zurda Irene Samper Bilbao (Zaragoza, 1998) vestirá a camisola laranxa do Pescados Rubén Burela FS a próxima tempada. A campioa de Europa, asidua da Selección Española desde 2017, chega á terra mariñá procedente do AD Alcorcón FSF.
“Era unha oportunidade que non podía deixar escapar máis”, asegura a propia futbolista, tras o anuncio da fichaxe co seu novo equipo.
Samper chega a Burela coas ideas claras
Despois de 6 tempadas e como unha das iconas nas filas alfareiras con tan só 23 anos, Irene Samper dá o salto ao conxunto das Guerreiras Laranxas con ganas de chegar ao máis alto: “Non foi sinxelo porque me vou moi lonxe da casa pero creo que non podería tomar mellor decisión. Era unha oportunidade que non podía deixar escapar máis; o meu obxectivo é seguir mellorando deportiva e persoalmente e estou segura de que o conseguirei rodeada das grandes xogadoras do Pescados Rubén Burela” confesaba.
A nova cara burelista desexa que “oxalá poidamos gañar todo; chego coa ilusión e ambición de alzarme con todos os títulos a próxima tempada”.
Irene Samper é a segunda incorporación das campioas Liga, Copa da Raíña e Supercopa de España, xunto á peche alacantina Elenita. Ambas serán presentadas oficialmente nas próximas semanas.
