O Burela Pescados Rubén FSF quixo deixar a eliminatoria da Copa Galicia atada desde o primeiro partido e pasou polo pavillón da Sagrada Familia da Coruña coma unha apisoadora. As lucenses venceron a domicilio ás coruñesas por un rotundo 1-10 polo que deixa practicamente sen opcións na Copa ás herculinas.
O Viaxes Amarelle FSF, dirixido por Jorge Basanta, afrontaba no martes de Entroido o partido de ida de semifinais da Copa Galicia Feminina FS recibindo a visita do vixente campión da citada competición. As visitantes empezaron moi fortes e demostrando a súa pegada; ante a cal, as herculinas fixeron todo o posible por contrarrestalo, pero terminaron cedendo unha ampla goleada en contra; dando a vitoria ao Burela Pescados Rubén FSF por un marcador de 1-10. Resultado que complica moito as opcións das herculinas para o partido de volta de semifinais.
O partido empezaba cun cadro herculino situado nunha defensa a media cancha, onde tentarían sorprender á contra; e coa porteira xogadora, preparada desde o banco; pero aos 38 segundos de xogo, Cilene adiantaba ás visitantes cun disparo frontal de dez metros, axustado ao pau da portaría herculina.
As locais reaccionan sacando o xogo de cinco, pero non conseguen xerar perigo, e pola contra atópanse co 0-2 no marcador no minuto 4, cando Lara Balseiro finaliza unha xogada de saque de esquina cun disparo frontal de 12 metros axustado ao pau da portaría do Viaxes Amarelle FSF.
O conxunto da mariña lucense tiña a posesión do balón e eran os que xeraban o perigo, mentres que as herculinas eran incapaces de sorprender, e así no minuto 7, Peque finalizaba unha xogada dentro da área para subir o 0-3 ao luminoso.
Apenas transcorrera o primeiro cuarto do partido, e as visitantes puñan terra polo medio, ante un Viaxes Amarelle FSF que non conseguía xerar o perigo suficiente para recortar distancias no marcador.
Xa a falta de de seis minutos para o final da primeira metade, Lara Balseiro repetía gol cunha xogada similar á do seu primeiro gol, ao finalizar un saque de esquina cun tiro frontal.
As locais non baixaban a tensión do partido, pero o encontro púñase costa arriba, cando a falta de dous minutos para o tempo de asueto, Jenny Lores finalizaba unha xogada de ataque visitante e subía o 0-5 ao marcador; e xa sen tempo a reaccionar nos últimos segundos da primeira metade, María Gómez anotaba en propia porta ao tentar desviar un balón de saque de falta visitante.
Co parcial de 0-6, o partido íase ao tempo de asueto de ambos os equipos, cun marcador do todo favorable para as visitantes.
Media dúcia de goles para o Burela mediado o partido
Á volta do descanso, as herculinas subiron un pouco a súa liña de presión, e empezaron a ter algo máis de perigo sobre a portaría visitante, aínda que sen ocasións do todo claras para abrir o marcador; aínda que se conseguían aguantar o ataque das visitantes.
Pouco antes da medianía do segundo período, Jenny finaliza un centro á área e pon o 0-7 para o Burela Pescados Rubén FSF. Xa co Viaxes Amarelle FSF envorcado nunha presión alta sobre o seu rival, as visitantes fan unha boa xogada de saída de presión e Ale de Paz no un para un con Tami, cruza o balón ao pau contrario e pon o 0-8.
Case sen tempo a respirar, as locais tentan atacar, e as visitantes rouban un balón, e Ale de Paz en xogada persoal pon o noveno da mañá para as mariñás.
Estes dous goles activaron ao conxunto visitante, que apenas uns segundos máis tarde puñan o 0-10 no marcador, cun tanto anotado por Cilene. Quedaban aínda sete minutos de partido por diante, e aínda con dez goles en contra, o cadro herculino quería seguir loitando cada balón, e a falta de seis minutos para o final do tempo regulamentario, Inés Suárez rouba en primeira liña un balón e no un para un coa meta visitante, pon o 1-10 no marcador.
Aínda quedaba partido por diante, e as herculinas tiveron algunhas das súas mellores ocasións, pero incapaces de finalizalas, terminaron o encontro cun marcador de 1-10.
Este resultado deixa á escuadra herculina practicamente sen opcións reais de clasificarse para a final da Copa Galicia Feminina FS, aínda que terán que disputar o partido de volta de semifinais en casa do Burela Pescados Rubén FSF o vindeiro mércores 18 de marzo de 2020, en horario e pavillón aínda por determinar.
O Viaxes Amarelle xa pensa na Liga
Tras este encontro da tempada, o Viaxes Amarelle FSF volverá aos adestramentos o xoves, para preparar o seguinte partido da competición regular de liga. Na que será a décimo oitava xornada, recibindo a visita do último clasificado, partido que se disputará na tarde do sábado 29 de febreiro de 2020 ás 18:00 horas no Pavillón do Complexo Deportivo de Elviña I (A Coruña) recibindo ao Ribamontán al Mar.
FICHA TÉCNICA
VIAXES AMARELLE FSF: Tami, Patri Romaní, María Gómez, Yaiza, Patri Corral (cinco inicial), Irune Santesteban, Inés Suárez, Mónica Rodal e Nuria González.
BURELA PESCADOS RUBÉN FSF: Jozy, Cristina, Cilene, Peque, Lara Balseiro (cinco inicial), Danny, Jenny, Lucía, Ale de Paz e Jenny Lores.
GOLES: 0-1 Cilene (min. 1); 0-2 Lara Balseiro (min. 4); 0-3 Peque (min. 8); 0-4 Lara Balseiro (min. 14); 0-5 Jenny Lores (min. 18); 0-6 María Gómez (propia puerta) (min. 19); 0-7 Jenny (min. 28); 0-8 Ale de Paz (min. 30); 0-9 Ale de Paz (min. 32); 0-10 Cilene (min. 33); 1-10 Inés Suárez (min. 34).
ÁRBITROS: Manuel Dans Rey e Borja Moreira Bermúdez do Colegio de Árbitros da Coruña. Mesa: Berta García Vázquez del Colegio de Árbitros de A Coruña. Tarxetas: Sen tarxetas.
INCIDENCIAS: Partido correspondiente á ida de semifinais da Copa Galicia Feminina FS disputado o martes 25 de febreiro de 2020 no Pabellón Municipal da Sagrada Familia (A Coruña) entre o Viaxes Amarelle FSF o Burela Pescados Rubén FSF.
