A última xornada da Primeira División de Fútbol Sala trouxo un dobre derbi galego. O Pescados Rubén Burela recibía en casa ao Ourense Envialia, mentres que o Marín Futsal facía o propio co Poio Pescamar. Finalmente, as vitorias foron dos dous equipos máis fortes, as laranxas e as vermellas, que se manteñen na zona alta da clasificación.
En Burela, o equipo local venceu por un 3-2, apostando polo xogo de cinco. Pola outra banda, as poienses triunfaron por un 0-2, non sen ter que esforzarse ante un Marín que loitou sen descanso.
Burela vs Ourense Envialia
No norte de Galicia, o derbi entre o Pescados Rubén Burela e o Ourense Envialia celebrábase en Vista Alegre.
Nos primeiros minutos de partido, o dominio foi local, obrigando a Vanessa a esforzarse baixo paus. Porén, as laranxas adiantáronse no marcador mediante Peque, tras o roubo da 13 burelista. As Guerreiras seguiron chegando a meta contraria, con grandes accións de Bea Mateos, Peque e Lara, pero Vanessa seguía evitando que o gol subira ao electrónico.
Xa na segunda metade, as visitantes víronse fortes e subiron o nivel nos ataques, equilibrando forzas coa defensa. A exburelista Judith tivo a súa ocasión de anotar, pero Jozi paroulles os pés na portería. O empate chegaría no minuto 28, co gol de María Arias nunha rápida saída de Vanessa que conduciu Nerea Lorenzo.
As locais loitaron por recuperar a vantaxe perdida, pero as ourensás non se quedaban atrás. As ocasións alternábanse en ambas metas, sen que o marcador mudara de resultado.
Todo cambiou no minuto 34 da man de Laura Uña. A xogadora do Envialia anotou o 1-2 desequilibrando o partido. Véndose por debaixo, as laranxas apostaron polo xogo de cinco con Bea Mateos. Lara Balseiro e Elenita estiveron preto de asinar o empate, pero este chegaría no 26 co penalti de Cilene. Co 2-2 as locais seguiron presionando para levarse a vitoria, que se materializaría a minuto e medio do pitido final. Lara Balseiro anotou o gol definitivo que deixaría o derbi no 3-2 final.
Marín Futsal vs Poio Pescamar
No sur, o duelo galego enfrontaba a Marín Futsal, recentemente ascendido, e Poio Pescamar, un dos grandes clubs do futsal español. O resultado final do 0-2 demostrou un desnivel que non se viu no campo, no que as locais pelexaron con unllas e dentes.
A primeira ocasión clara do encontro foi para o Marín, que estivo preto de anotar cun disparo de Gaby desviado finalmente por Caridad. As vermellas confiaron no seu seguro na portería para aventurarse nos ataques ao longo da primeira metade.
Porén, as locais non se quedaban atrás, e tamén creaban boas oportunidades que pola contra non chegaban a materializar. Finalmente, o empate a ceros romperíase a cinco minutos do descanso, cun gol de Jane para as visitantes.
Tras a pausa, o guion non mudou. A igualdade era maior da que a táboa clasificatoria refrexa, cun Marín loitador que presionaba para obter premio. Con todo, o Poio soubo aguantar a presión rival sen excederse nas faltas. O segundo tanto para as visitantes chegaría outra vez grazas a Jane, pero desta vez como asistente, dándolle o gol a Dani Sousa no minuto 36.
Nos últimos minutos, as locais probaron co xogo de cinco con Pau, pero as visitantes mantíñanse fortes en defensa, pechando o 0-2 final.
Final, Final, Final
Final en el Pabellón de A’Raña.
PRIMERA DIVISIÓN FEMENINA FS@Grupo_Ence @marin_futsal– 0
🆚@PoioPescamarfs -2#xuntadegalicia #concellodemarin #enceplansocialpontevedra #deputaciondepontevedra #deportegalego #non #altersaude #diariodepontevedra #abanca pic.twitter.com/D1eJ5MXjfW— Marin Futsal (@marin_futsal) October 3, 2021
Tras esta terceira xornada competitiva, o equipo galego mellor posicionado é o Poio Pescamar, con sete puntos na terceira posición. Ségueo de preto o Burela FS, en quinta posición tamén con sete puntos.
Na zona baixa están o Ourense Envialia, 14º con cero puntos, empatado co Marín Futsal, só unha posición por debaixo.
