O Pescados Rubén Burela é o vixente campión do título de Liga e esta fin de semana deberá defender a súa coroa. As mariñás, vencedoras da Copa da Raíña, da última Supercopa e nomeadas como o mellor equipo do mundo, disputarán o Final Four da Primera División en Torrejón de Ardoz no pavillón Jorge Garbajosa.
Serán o único conxunto galego que compita nesta fase final, xa que o Poio Pescamar, outro club con posibilidades na segunda fase, caeu na última xornada ante o AD Alcorcón, perdendo o seu pase ao play off polo título.
O Burela e os competidores da Final Four
As xogadoras do Burela só sufriron dúas derrotas ao longo da tempada, ambas da man do Futsi Atlético Navalcarnero, primeiro clasificado. Polo resto, o equipo de Julio Delgado está a realizar unha tempada case perfecta, sumando polo de agora os últimos sete trofeos que disputaron.
O equipo madrileño do Futsi proclamouse campión do torneo regular despois de xogar 26 xornadas. Con 21 vitorias e 110 goles a favor fronte a só 27 tantos en contra, son o conxunto máis goleador e menos goleado da categoría. Nas súas filas está a máxima anotadora, Ari, quen marcou xa 33 goles.
Pola súa parte, o STV Roldán chega na terceira posición e selou a súa participación nesta Final Four na última xornada. Foron o mellor equipo do campionato no 2018, cando tiveron que remontar o tanto inicial do FSF Móstoles, demostrando o seu espírito gañador e ambición. Este será o primeiro rival do Burela.
Por último, o AD Alcorcón foi o último en adquirir o pase ao play-off polo título. As madrileñas precisaban gañar na Seca ante o Poio Pescamar para pasar á fase final, obxectivo que conseguiron cun emocionante 1-3. Con este resultado, as alfareiras disputarán os seus segundos play-off consecutivos (a tempada pasada foron subcampioas).
O duelo das Guerreiras Laranxas do Burela celebrarase o vindeiro sábado, 13 de xuño, ás 13:30 horas. Os gañadores das semifinais disputarán a gran final o domingo, 14 de xuño, ás 16:00 horas.
Os partidos non poderán seguirse por ningunha canle de televisión, pero serán retransmitidos vía streaming a través das diferentes canles da Real Federación de Fútbol.
