O trono da Copa de S.M. A Raíña segue sendo laranxa. O Pescados Rubén Burela FS revalida o seu dominio absoluto na cita impoñéndose na final do torneo do ko ao conxunto do Melilla Sport Capital Torreblanca FS por un marcador de 1-3.
A maior experiencia xogando partidos deste perfil que atesoran as Guerreiras Laranxa impúxose fronte ao equipo revelación da tempada. Así, o Pescados Rubén Burela sumabaq a súa terceira Copa da Raíña consecutiva e a cuarta da historia do club laranxa. A capitá, Peque, recibiu o trofeo de mans do vicepresidente da Real Federación Española de Fútbol RFEF, Pablo Lozano.
Soubo o conxunto do Pescados Rubén Burela FS como imprimir o seu xogo con dominio, posesión e ocasións. Peque foi a futbolista que máis buscou a rede de Sara Soares nos primeiros compases da final, pero foi un gol que tocou na defensa melillense o que lles deu a vantaxe ás da Mariña, no minuto 8. O gran pase en profundidade de Jane a Leti Cortés deu en Fabi favorencendo os intereses das galegas. Dispuxeron acto seguido as de Lucas de moito perigo, con Jane e Leti fronte a Sara Soares como a gran salvadora das melillenses.
O adestrador do Torreblanca FS, Marcio Santos, tentou cambiar a dinámica pedindo máis risco ao seu equipo e mesmo probando nunha aposta breve por xogo de cinco, ante a gran resposta e repregamentos das laranxas freando calquera indicio en ataque.
Dany, a falta de 54 segundos para o descanso, subiu o 0-2 recibindo de Cami e virándose para sentenciar dun golazo en disparo cruzado que entrou por baixo das pernas da meta melillense. Cami a punto estivo de ampliar co terceiro nos últimos segundos antes da bucina.
O Burela chegou a ir 0-3 na final da Copa da Raíña
Regresou moi o conxunto de Lucas con dobre tentativa de Cami fronte a Sara Soares. A meta melillense freou tamén a Luísa Mayara, pero nada puido facer fronte á letal Dany, que aproveitou a falta de entendemento rival en saque de banda para subir o 0-3.
Apostou por xogo de cinco o equipo de Marcio Santos e atopou recompensa acto seguido, en menos dun minuto, cun pase de Lydia a Bia, que tocou en Ale de Paz con traxectoria cara á portería.
O Melilla Sport Capital Torreblanca FS encomendouse á porteira xogadora para ir a pola remontada fronte á solidez defensiva das galegas que se armaron de paciencia e concentración para anular as intencións das melillenses, cunha Jozi Oliveira perfecta e imperturbable baixo paus.
Ao final do partido, a capitá, Peque, acudía a recoller o trofeo de campioas de Copa da Raíña 2021 que lle entregou o vicepresidente da Real Federación Española de Fútbol RFEF, Pablo Lozano.
FICHA TÉCNICA
MELILLA SPORT CAPITAL TORREBLANCA FS: Sara, Lydia, Fernanda, Bia e Emilly – quinteto inicial -. Tamén xogaron: Julia, Jacke, Fabi e Thais.
PESCADOS RUBÉN BURELA FS: Jozi Oliveira, Dany, Peque, Cami e Luísa Mayara – quinteto inicial -. Tamén xogaron: Ale de Paz, Jane, M. Cortés e Bea Mateos.
GOLES: 0-1, minuto 8, Leti (Fabi, propia porta); 0-2, minuto 20, Dany; 0-3, minuto 23, Dany; 1-3, minuto 24, Ale de Paz ( propia porta)
ÁRBITROS : Sara Gutiérrez // Leticia Romero // Lydia Guillem. Amonestaron con cartón amarelo polo Melilla Sport Capital Torreblanca FS á futbolista Fernanda (minuto 10)
INCIDENCIAS: Partido de final de Copa de S.M. A Raíña disputado na a Cidade do Fútbol de Las Rozas, con emisión en directo de Teledeporte. Xunto ao presidente do Pescados Rubén Burela FS, Manuel Blanco, tamén apoiaron ás Guerreiras Laranxas desde o palco de autoridades o vicepresidente da Real Federación Galega de Fútbol, Pablo Prieto, e o concelleiro de Deportes de Burela, Ramiro Fernández.
