Os primeiros pasos do Conservas Orbe Rubensa Bm Porriño na Liga Guerreras Iberdrola 2020-21 serán fóra de Galicia. Hoxe, sábado 12 de setembro, ás 19:00 horas, xogarán no Pabellón de la Arena en Gijón contra o Liberbank.
As do Porriño arrincan a competición no Grupo B. A primeira fase deste novo formato da Liga Guerreiras Iberdrola levaraas a medirse aos conxuntos do Balonmano Salud Tenerife, Balonmano Elche, Club Balonmano Morvedre, Rocasa Gran Canaria, Adesal Cordoba e KH-7 Bm Granollers. Todas buscarán o seu pase ao seguinte nivel competitivo no grupo que loita polo título.
O conxunto asturiano, vén de xogar a Copa da Raíña, onde conseguiu meterse nas semifinais e perdendo pola mínima ante o Balonmano Elche.
Ismael Martínez, adestrador do BM Porriño: “o Gijón chega máis rodado ca nós”
Á fronte do corpo técnico do Conservas Orbe Rubensa Bm Porriño está Ismael Martínez que explicou que, “o Gijón vén de facer unha moi boa Copa da Raíña e coa moral moi alta. Creo que chegarán un pouco máis rodadas que nós, porque puideron facer unha pretemporada máis normal e xa competiron”.
En canto á súa defensa e ataque, resaltou o nivel no que están a xogar Aida Palicio, Cecilia Cacheda e Marizza Faria. Ademais de María Palomo e Natalia Martínez que están a achegar moito defensivamente.
Ismael recoñece que o seu equipo se atopa nun bo momento, “creo que chegamos moi ben tanto fisicamente como animicamente. Esperamos empezar ben a tempada nunha pista complicada”.
Ismael Martínez, adestrador do Conservas Orbe Rubensa BM Porriño: “o Gijón vén de facer unha moi boa Copa da Raíña e coa moral moi alta. Creo que chegarán un pouco máis rodadas que nós, porque puideron facer unha pretemporada máis normal e xa competiron”.
Debido ás limitacións pola pandemia da COVID-19, haberá un aforamento limitado cun máximo de 300 persoas. Para poder asistir será necesario cubrir o formulario que o Liberbank Gijón ofreceu nas súas redes sociais. Ademais, tamén haberá streaming para poder gozar do encontro desde casa.
