O Dépor ABANCA caeu derrotado en Abegondo por un claro 1-3 e ante un rival directo, o Real Betis Féminas. Este resultado devolve ás coruñesas ao último posto da táboa e as coloca a seis puntos da salvación.
Non é a primeira vez que o Dépor ABANCA ten que refacerse diante dun marcador adverso na casa. Pero desta volta, cada vez que as branquiazuis tentaban sacar a cabeza, o xogo lles endosaba un novo mandobre que lles impedía remontar.
As andaluzas conseguiron abrir o marcador cando o partido aínda nacía e iso descolocou ás coruñesas no arranque do encontro. O 1-0 foi obra de Otermín que recibía o esférico e gañáballe a partida no man a man a Esther Sullastres.
A presión alta das verdibrancas frustraba as tentativas das galegas de gozar de posesións longas e idear xogadas de ataque elaboradas. Os roubos e as contras das béticas levaban perigo, pero foi a balón parado como conseguiron o segundo tanto no minuto 18. O Betis botaba un saque desde o curruncho que peiteaba no primeiro pau Altuve e remataba Ana González de cabeza no limio da área pequena da meta defendida por Sullastres.
De manter a porta vacía a encaixar dous goles antes de que se levasen consumidos 20 minutos de xogo. O Dépor intentaba agrandar o campo pero so conseguía levar perigo a través algún córner.
No minuto 36 chegaría outra mala nova para as deportivistas, Lady Andrade pedía o cambio ao notar molestias no xeonllo. Entraría no seu lugar a canteirana Eva Dios. A colombiana está pendente de que se lle realice unha resonancia magnética para coñecer o alcance da súa lesión.
No segundo período as deportivistas saíron a por todas, e sen complexos, e volveron a tentar levar perigo á meta de Méline Gerard. A posesión foi branquiazul e chegaron as ocasións. Primeiro Iris mandaba un balón sobre o traveseiro nun libre directo, e logo Peke anotaba o 1-2 para alentar aínda máis os anhelos de remontada de As Nosas deportivistas. O pase que remachou a dianteira foi da súa mellor aliada ante a meta rival: Athenea que meteu a quinta para gañar espazo por velocidade.
Todo parecía reconducirse cando o Dépor ABANCA recibía un novo golpe na liña de flotación. Noelia Villegas desviaba coa man un tiro de Altuve e a colexiada pitou o pertinente penaltie e a explusión, con cartón vermello directo, da deportivista.
Ángela Sosa nota para o Betis de penaltie
Desde o punto fatídico, Ángela Sosa non errou e transformou o penaltie en gol ao bater a Sullastres co 1-3 que resultaría definitivo.
Con so dez xogadoras sobre o tepe da Cidade Deportiva de Abegondo, o Dépor ABANCA seguiuno intentando. Non tirou a toalla nin baixou os brazos, tal e como destacaba na rolda de prensa posterior o seu adestrador Manu Sánchez.
Manu Sánchez: “Ninguén viu nunca un partido do Dépor ABANCA no que alguén baixase os brazos”
E tivo dúas máis o conxunto branquiazul. A primeira cunha escapada de Eva Dios que meteu o balón para Peke, quen enviu unha asistencia a Athenea que se lle quedou atrás a cántabra por pouquiño. A segunda foi da propia Peke que mandou un pepinazo desde a frontal coa perna esquerda.
A última sería para Kika que buscou sorprender á gardamallas visitante despexando un balón bombeado que petou na parte de arriba da portaría.
FICHA TÉCNICA
RC DEPORTIVO ABANCA: Sullastres, Cris, Iris Arnaiz, Blanco, Villegas, Alba Merino (Kika, min. 77), Ainoa, Gaby, Lady (Eva Dios, min. 37) (Helena, min. 77), Athenea e Peke.
REAL BETIS FÉMINAS: Méline Gerard, Nuria, Valle, Dorine, Paula Perea, Ana González, Ángela Sosa, Rosa Otermín (Aixa Salvador, min. 62), Rosa Márquez (Bea Parra, min. 86), Medina (Ana Hernández, min. 86) e Altuve (Mari Paz, min. 75).
GOLES: 0-1 Rosa Otermín (min. 2); 0-2 Ana González (min. 18); 1-2 Peke (min. 49); 1-3 Ángela Sosa, de penalti (min. 55).
ÁRBITRA: Díaz García (c. tinerfeño). Expulsou con cartón vermello directo a Noelia Villegas (min. 54). Amosou cartón amarelo á deportivista Alba Merino (min. 58) e a bética Rosa Márquez (min. 74).
INCIDENCIAS: Partido aprazado da 15ª xornada da Primera Iberdrola disputado en Abegondo a porta pechada debido ás restricións de público nos acontecementos deportivos que están vixentes en Galicia neste momento por mor da pandemia de COVID-19.
