Case 600 días despois, 578 en concreto, o BAXI Ferrol volve coñecer a derrota. As galegas xogaron este mércores a segunda xornada de LF Endesa ante outro equipo recentemente ascendido, o Innova TSN Leganés, que dominou na súa casa aproveitando os erros ferroláns. O partido rematou no 80-69.
O equipo da cidade departamental acusou excesivos erros desde o tiro exterior, o que pasou factura co paso dos minutos. Lino López, adestrador do BAXI, admitía tras o encontro que “sempre fumos detrás, tanto no marcador como nas forzas. Elas tiveron acerto nos primeiros minutos e nós non tivemos acerto no tiro exterior”.
Nesta liña, o preparador advirte que “nesta liga temos que estar moi duras defensivamente, e só o fixemos por momentos no partido, e moi concentradas en todos os sentidos. É unha liga durísima, temos que facer moitas cousas ben”.
Un BAXI descoñecido desde a liña exterior
Nos primeiros minutos Jenna Allen foi a encargada de abrir o marcador, pero a vantaxe ferrolá pouco durou. En pouco tempo o Leganés fíxose grande en casa, controlando ao BAXI e adiantándoo no electrónico para poñerse por diante. Pasado o ecuador do primeiro tempo, as locais xa tiñan 11 puntos de vantaxe.
O parcial seguiu na mesma tónica, cun equipo galego errando e as madrileñas aproveitando cada ocasión para seguir sumando. Este cuarto remataría no 19-14. Para o segundo tempo a balanza equilibrouse máis, cun BAXI máis serio en defensa e concedendo menos oportunidades ás rivais. Porén, o Leganés seguía liderando e marchou ao descanso a seis puntos por enriba.
Tras o descanso, a historia repetiuse. Un pouco certeiro BAXI desde a liña exterior acusaba os seus erros, cedendo ante as madrileñas que levaban o mando do partido. Malia mellorar o seu acerto baixo o aro, o equipo de Lino López non lograba a remontada, xa que o conxunto local tampouco fallaba nos seus tiros.
Chegados ao último tempo, a vitoria parecía case decidida. As galegas seguiron loitando nos balóns, pero sen o seu característico tiro exterior, o posible triunfo estaba cada vez máis lonxe. Finalmente, as locais vencerían por unha vantaxe de 11 puntos, finalizando o encontro nun 80-69.
FICHA TÉCNICA
INNOVA TSN LEGANÉS: Ruffin (15), Muhate (8), Jespersen (11), Hermida (17), Palenikova (10). Tamén xogaron: Tate (15), Roglic (2), Koizar (2) e Mokango (-).
BAXI FERROL: Koenen (12), Ivanovic (14), Grande (5), Allen (6), Swart (7). Tamén xogaron: Villegas (6), Gari (2), Wadoux (6) e Cabrera (-).
MARCADOR: 19-14, 15-14, 26-22, 20-19
ARBITRAXE: López Herrada, Zamora Rodríguez e Aranza García.
INCIDENCIAS: Partido da segunda xornada da LF Endesa disputada no pavillón Europa.
