Coa 23ª xornada da Liga Feminina 2, o BAXI Ferrol buscará a súa 23ª vitoria. O rival e posible vítima nesta ocasión será o GDKO Ibaizabal, que actúa como local o sábado, 6 de marzo, ás 19:00 horas. De lograr este trunfo, as ferrolás terían garantido o título no Grupo A da categoría de prata.
Completamente intratable, o cadro galego do BAXI Ferrol leva un pleno de vitorias, que lle merecen sumar 44 puntos e manter unha distancia de catro coas segundas clasificas: o Osés Construcción Ardoi.
Este foi precisamente o seu último rival, que logrou poñer ás todopoderosas universitarias contra as cordas e faceles ver perigar o seu dominio. As visitantes case dan a sorpresa no último cuarto, pero as galegas saíron do paso e batiron o seu récord na marca de vitorias en LF2.
Lino López: “Trataremos de mellorar nas cousas que fixemos mal”
Para esta nova xornada, as galegas teñen erros a corrixir, e, como comenta o seu adestrador, Lino López, “trataremos de mellorar nas cousas que fixemos mal a semana pasada e que estivemos traballando nelas e intentar seguir crecendo como equipo”.
Pola súa parte, o equipo local é un Ibaizabal que estaba chamado a clasificarse para a fase de ascenso pero foi castigado por unha tempada irregular.
Actualmente ocupa a sétima posición con 32 puntos dun equilibrio de once vitorias polas mesmas derrotas. Con estes números, e a falta de catro xornadas, xa non ten posibilidades de loitar pola promoción.
Así ve Lino López ao rival do BAXI
Precisamente, isto destaca Lino López, o adestrador do BAXI Ferrol. Segundo o técnico, as vascas “non estiveron como se esperaban, pero contan con xogadoras como Juana Molina e Rebeca Cotano, con moita experiencia en Liga 1, así como coas finlandesas Koskimies e Tulonen“.
Por estes motivos, as ferrolás non deben baixar a garda e terán que ser fortes en defensa, para facer fronte a baloncestistas desta talla.
O líder acudirá con todas as súas xogadoras
Para a viaxe a Galdácano, o BAXI contará con todas as súas xogadoras en perfectas condicións, xa que Natalia Rodríguez xa puido traballar con normalidade ao longo da semana.
Lino López: “Aínda temos un mes por diante de traballo para chegar na mellor forma posible (á fase de ascenso)”
Coa primeira fase a piques de rematar, as ferrolás non perden a concentración, pero xa teñen un ollo posto na segunda parte, a do posible ascenso. “As xogadoras están desexando que cheguen os partidos e xa empezan a pensar na fase, pero antes aínda temos un mes por diante de traballo para chegar na mellor forma posible”, advirte o seu técnico.
