En menos de tres días, o BAXI Ferrol suma unha segunda dolorosa derrota. As ferrolás recuperaban este martes a 13ª xornada, visitando ao Kutxabank Araski na súa pista, nun encontro igualado, no que as locais remontaron no minuto final para levarse a vitoria (84-82).
“É duro. Perder un partido que tes practicamente gañado a falta de cinco minutos doe. Estou moi orgulloso do traballo do equipo, moitísimo. Só nós sabemos as circunstancias nas que adestramos esta semana”, apuntaba tras o encontro o adestrador Lino López
O equipo xa xogara o domingo ante o Campus Promete, noutro encontro intenso no que a vitoria foi para as rioxanas xa no tempo de prórroga.
Man a man
Malia o cansancio acumulado, as de Lino López demostraron a súa profesionalidade na pista vasca, saltando á cancha con enerxía e iniciando o partido cun alto ritmo de xogo. A través dun certeiro tiro exterior, as ferrolás facíanse co primeiro cuarto (16-22).
Pero no segundo parcial, o Araski reaccionou poñendo ás galegas contra as cordas. Nos primeiros minutos o dominio seguiu sendo ferrolán, pero antes do descanso as locais presionaron para poñer o 40-46 no marcador.
Tras o descanso, as vascas lograron darlle a volta ao marcador e iniciar a súa remontada. Malia a igualdade e o man a man que se podía ver no parqué do Mendizorrotza, o BAXI tomaba o control de novo mediante o tiro exterior para chegar aos 10 minutos finais
Pasado o ecuador do último cuarto, as galegas vencían por 16 puntos, no que parecía unha vitoria asegurada. O Araski, lonxe de baixar os brazos, soubo aproveitarse dos fallos das galegas para remontar o marcador, e poñer o 82-82 que facía pensar xa na que sería a segunda prórroga en cuestión de días para o BAXI.
Porén, todo mudou no último minuto, cando un erro na defensa permitiulle a Atkinson anotar a canastra definitiva e gañadora do encontro.
📹 #LFEndesa: Canasta ganadora de @tanayaatkinson‼️
🟢 La norteamericana culminó a lo grande la remontada de su @Araski sobre el @UniFerrol 🙌
📊 25p – 8 rb – 6 as – 2 rec
📺 Así lo hemos vivido en #CanalFEB ⬇ pic.twitter.com/TknFkEvbrY
— CompeticionesFEB (@CompeticionFEB) January 11, 2022
López, orgulloso dun equipo que medra
Despois do encontro, Lino López pasou por rolda de prensa, onde salientou o traballo das xogadoras ferrolás, sobre todo no contexto que está a vivir o equipo.
Tras a volta do Nadal, algunhas das pezas do BAXI deron positivo en COVID, non puidendo adestrar co grupo, mentres que outras xogadoras están tocadas. “Ver o traballo do equipo e como o deixaron todo cada segundo, tamén no campo, como estiveron unidas… Estou moi orgulloso delas. Xogar dous partidos do nivel que xogamos nas circunstancias nas que o fixemos é para crer no equipo, confiar en que as vitorias chegarán”, subliña o adestrador.
Lino López: “Xogar dous partidos do nivel que xogamos nas circunstancias nas que o fixemos é para crer no equipo”
“Isto é o que quería a principio de tempada, ter un equipo que o da todo na pista, que non se deixa nada ata o último segundo. Non conseguir a vitoria doe, e tal e como se desenvolveron os partidos, pero o equipo está medrando, cada vez está mellor e quédome con iso”, concluíu.
Tras este partido, o BAXI é o 12º clasificado, con 19 puntos en catro vitorias e onde derrotas.
FICHA TÉCNICA
KUTXABANK ARASKI (84): Leia Dongue (24), Tanaya Atkinson (25), Izaskun García, Tamara Seda (10), Katarina Zec (5) -quinteto inicial-. Tamén xogaron: Gracia Alonso (2), Arrate Agirre (14), Laura Pardo e Bea Sánchez.
BAXI FERROL (82): Taylor Koenen (15), Miliica Ivanovic (4), Carmen Grande (3), Jena Allen (12), Sune Swart (8) -quinteto inicial-. Tamén xogaron: Alicia Villegas (10), Irenme Garí (6), Malama Leaupepe (8) e Natalia Rodríguez (16).
ARBITRAXE: Lucas de Lucas, González Cuervo, Gómez Hernández.
INCIDENCIAS: Recuperación da 13ª xornada competitiva, celebrada no polideportivo Mendizorrotza de Vitoria.
