Doce vitorias de doce posibles manteñen como líderes indiscutibles ás xogadoras do BAXI Ferrol na Liga Feminina 2. Fortes tanto en casa como fóra, as xogadoras dirixidas por Lino López superaron xa a barreira de mil puntos a favor a falta dun partido para que finalice a primeira volta.
Nin equipos establecidos na parte alta da táboa como o Celta Zorka Recalvi ou o Osés Construcción Ardoi foron rivais para as ferrolás. A dinámica que segue o conxunto departamental esta tempada é de lograr vitorias moi contundentes contra os seus rivais.
O BAXI é imparable
En nove de doce ocasións, o conxunto de Lino López logrou unha diferenza de máis de 30 puntos no marcador contra as súas rivais. Os únicos equipos que foron quen de “frear” (entre moitas comiñas) ás ferrolás foron Ardoi (perdendo de dez puntos), GDKO (de 23) e Celta (de once).
Ademais, o BAXI Ferrol tamén sobrepasou a barreira dos cen puntos anotados nun partido, primeira vez que isto ocurre nesta tempada de LF2. Foi contra o Maristas Coruña, nunha undécima xornada na que o total dos puntos a favor do equipo de Ferrol chegou a duplicar a dos puntos en contra (962 fronte a 481).
O resultado encontro foi a segunda mellor marca histórica do club, tanto polos tantos anotados como pola diferenza respecto ao rival. Foi ademais a segunda mellor racha de vitorias do universitario.
A falta dun partido e unha volta, salvo sorpresa, o BAXI subirá de categoría para o próximo curso. As ferrolás son o conxunto mellor valorado da competición, cunha media de 105,6 puntos.
Baloncestistas como Irene Gari, Dynn Leaupepe, Patricia Cabrera ou Jenna Allen atópanse entre as mellores da LF2 en áreas como máximas anotadoras, mellor valoradas ou mellor eficacia desde a liña de tres.
O partido que pechará a primeira volta será ante o Ulla Oil Rosalía, un equipo que está demostrando que sabe ao que xoga e está a crecer moito competitivamente na categoría.
As de Lino López despiden o ano xogando en casa, na Malata, e marcharán ás vacacións de Nadal con moito que celebrar, pase o que pase na décimo terceira xornada.
