A xornada presentábase difícil para o BAXI Ferrol, e as galegas non foron capaces de plantarlle cara ao Valencia Basket, un dos equipos máis potentes da competición (67-52). As universitarias comezaron o partido por detrás, nun encontro que o seu adestrador, Lino López, calificaría como “moi duro e moi esixente físicamente”.
En termos defensivos, as taronjas foron superiores, creando unha ampla vantaxe na primeira metade que o BAXI Ferrol non puido remontar, malia unha mellor segunda parte. Con esta derrota, as ferrolás marchan 14ª con 14 puntos.
Primeira parte sen acerto
No primeiro parcial, ningún dos equipos tivo moito acerto baixo o aro, aínda que o Valencia foi superior, chegando a anotar 9 puntos, destacando os cinco de Rebecca Allen, mentres que as galegas só anotaron 4, repartidos entre Jenna Allen e Sune Swart.
Para o seguinte tempo, as laranxas romperon o partido. O conxunto local foi quen de dobrar en puntos ás galegas, que quedaron atrás no partido, sufrindo unha diferenza difícil de remontar ante un equipo do talle do Valencia.
Salvadores liderou ás valencianas neste tempo, anotando 10 puntos. Pola súa banda, o BAXI respondía con tiros de campo, pero sen moito acerto na liña de tres e no tiro libre, a diferenza das rivais que rozaron o 90% de acerto nestes tiros. O descanso chegou cun 35-17.
Melloría na segunda metade
Para a segunda metade, as xogadoras de Lino López aumentaron a intensidade, nun parcial moito máis igualado entre os dous clubs, e que mesmo chegaron a liderar as galegas. A base de ataques, o BAXI comezaba a reducir distancias, vencendo no parcial por un 14-18, que porén non era suficiente para alcanzar no marcador ás laranxas.
No cuarto final, as locais volveron a dominar con claridade na súa pista. Cunha Allen imparable, seguida de Gulich, as galegas quedaban sen opcións, malia o acerto de Koenen e os triplos de Villegas e Rodríguez. Finalmente, o encontro rematou no 67-52.
Lino López: “As xogadoras estiveron loitando ata o final”
“A mágoa foi o segundo cuarto, é cando colle distancia un equipo da calidade do Valencia, con moitas xogadoras con capacidade para anotar”, explicaba o adestrador Lino López á fin do encontro.
Porén, as súas pupilas non baixaron os brazos: “Aí as xogadoras esiveron loitando ata o final. Costábanos xerar en ataque e atopar vantaxes pero o equipo non se descompuxo e estivo traballando e temos que quedarnos con iso”.
Valoración del entrenador del BAXI Ferrol @UniFerrol, @linolopez04, del partido @valenciabasket 67 – BAXI Ferrol @UniFerrol 52#LFEndesa #SienteElUni pic.twitter.com/V5zupW0z4Y
— Baxi Ferrol (@UniFerrol) December 4, 2021
