Nun partido no que o BAXI Ferrol foi de menos a máis, as ferrolás non foron capaces de culminar a remontada ante o Perfumerías Avenida, un equipo superior no parqué da Malata, que se levou os puntos da vitoria por un 44-66.
O equipo de Lino López comezou o partido con imprecisións que marcaron o transcurso do encontro, e cara os minutos finais as súas pupilas reaccionaron. Porén, xa era demasiado tarde, e a vantaxe conseguida polas visitantes nos tres primeiros cuartos permitiulles acadar un triunfo máis.
Con esta xa son tres as derrotas consecutivas que suman as galegas, situándose con nove puntos na décimo cuarta posición.
O BAXI cae ante un rival doutra liga
O Perfumerías Avenida non será un rival directo do BAXI esta tempada. Desde os primeiros compases do partido quedou claro no parqué da Malata que as salmantinas eran superiores, anotando puntos xa nos primeiros segundos tras o pitido inicial.
Para este encontro, Lino López confiou en Ivanovic, Grande, Wadoux, Allen e Swart como quinteto oficial, nun plantel que contaba coa baixa de Taylor Koenen. As universitarias apostaron polos tiros exteriores nos minutos iniciais, con Carmen Grande anotando os primeiros puntos para as ferrolás.
Malia os intentos das galegas, apoiadas en casa polo seu público, as visitantes eran claramente superiores na cancha e non tardaron en afianzar un colchón de puntos para xogar con tranquilidade e lucirse na Malata. Para a fin dos primeiros dez minutos, as ferrolás só anotaran 6 puntos fronte aos 19 das castelás.
No segundo cuarto, a tónica do partido seguiu o mesmo camiño, cun BAXI que sufría para anotar á vez que vía como o rival chegaba sen problemas ao aro contrario. Os tiros do Avenida entraban con facilidade, mentres que as de Lino López non tiñan oportunidades ante a canastra e non aproveitaban os tiros liberados.
Antes do descanso, o encontro semellaba completamente sentenciado co equipo universitario sen sorte nin acerto nos ataques. O conxunto visitante chegou a ter unha vantaxe de 29 puntos, que quedou en 27 para a pausa, cun 14-41 no luminoso.
Tras o paso por vestiarios, o BAXI Ferrol destacaba máis pola súa actitude que polo seu xogo. Con todo en contra, as de López seguían pelexando cada xogada, animadas pola afección, pero os ánimos non eran suficientes para dobregar ao Avenida. As pupilas de Íñguez seguían dominando e controlando o partido en todos os aspectos, impedindo que as ferrolás se convertiran nunha ameaza.
Espectáculo no último cuarto
Cun 23-62 en contra, o equipo universitario viuse arriba e sacou todas as súas armas nos últimos dez minutos. O derradeiro cuarto foi un espectáculo para a afección, e deixou unha imaxe do equipo moi esperanzadora.
Ao contrario do que se viu nos tres primeiros tempos, as de Lino López souberon manexar o partido nestes intres finais, cun espírito de remontada que porén non se podería realizar. A vantaxe das salmantinas era demasiado grande para solventala en dez minutos, pero as ferrolás ofreceron a súa mellor cara.
Cun éxito sen precedentes na xornada, as galegas anotaban canastra tras canastra, dobregando por fin ao Avenida, que sorprendeu cun escaso porcentaxe anotador. Así, malia a derrota final do BAXI, as locais conseguiron asinar un parcial 21-4 que fai pensar xa nos seguintes retos.
Final del partido en A Malata. Lo lógico es que se imponga la lógica.
BAXI Ferrol 44
Perfumerías @CBAvenida 66Parón y a seguir trabajando.#LFEndesa#SienteElUni pic.twitter.com/GCxpXomceL
— Baxi Ferrol (@UniFerrol) October 30, 2021
A LF Endesa sufrirá un parón de dúas semanas polas ventás das Seleccións, polo que o seguinte duelo das ferrolás será o 18 de novembro ás 20:00 horas ante o Lointek Gernika Bizkaia en terras vascas.
FICHA TÉCNICA
BAXI FERROL: Milica Ivanovic (15), Carmen Grande (4), Zoe Wadoux, Jenna Allen (4) y Swart (7) -quinteto inicial. Tamén xogaron: Alicia Villegas, Patri Cabrera, Natalia Rodríguez (12), Dynn Leaupepe e Irene Garí (2)
PERFUMERÍAS AVENIDA: Maite Cazorla (5), Andrea Vilaró (7), Hof (8), Alarie (5) y Katie Lou Samuelson (8) -quinteto inicial. Tamén xogaron: Leonor Rodríguez (6), Evans (4), Fasoula (9), Nogaye Lo Sylla (4), Karlie Anne Samuelson (10) e Silvia Domínguez
PARCIAIS: 6-20, 8-21, 9-21, 21-4
ARBITRAXE: Asier Quintas, Eduard Colomer e Fernando Ibañez
INCIDENCIAS: Partido correspondente á sétima xornada da LF Endesa.
