O BAXI Ferrol, nas semifinais da Fase Final (77-62)

As galegas do BAXI Ferrol teñen o primeiro billete para estar nas semifinais da Fase Final da LF2. Despois de vencer ao UCAM Primafrío Jairis (77-62), as ferrolás seguen invictas e avanzan un paso máis no ascenso a LF Endesa.

A pesar dun inicio costa arriba, as de Lino López lograron remontar no segundo cuarto e manterse por diante ata levarse a vitoria. Con este trunfo, as galegas agardan na semifinal do domingo ao seu rival, aínda por decidir.

Tropezo de inicio para o BAXI

O Jairis saltou á pista de Leganés con confianza e así o transmitiu desde o seu xogo. A súa efectividade nos lanzamentos de tres, permitiron facer un rápido parcial 3-16 que facía saltar as alarmas ferrolás. Pero a reacción do BAXI non se fixo esperar, e as súas xogadoras lograron superar cinco minutos de sequía, reducindo distancias ata un 15-25.

BAXI Ferrol vs Jairis na fase de ascenso / Manu Márquez - FEB — BAXI Ferrol vs Jairis na fase de ascenso / Manu Márquez – FEB

Remontada e a vitoria afianzada

No segundo cuarto, a saída de Benet e Rodríguez fixo que o marcador entre galegas e murcianas se axustara, cun parcial 23-9 que poñía o 38-34 antes da pausa. A férrea defensa do equipo de Lino López impediu que as rivais acertasen baixo o aro durante catro minutos, tempo que aproveitaron as galegas para remontar e aventaxar ás contrincantes.

Despois de pasar por vestiarios, o partido estaba completamente aberto, pero o BAXI Ferrol non ía deixar escapar a súa oportunidade de vencer. A súa caracterísitca rápida circulación de balón creaba unha distancia considerable no electrónico, grazas tamén ao acerto desde o triple de Brooke Salas, Dynn Leaupepe e Patri Cabrera. O último tempo chegaría co 62-46.

Así, no derradeiro cuarto, as ferrolás limitáronse a seguir o guion xa escrito que marcaba o camiño ás semifinais. Benet organizaba o xogo dun BAXI controlador, mentres que o Jairis loitaba por recortar distancias sen éxito. O partido rematou nun definitivo 77-62.

A valoración do adestrador Lino López

Tras o encontro, o técnico do conxunto ferrolán, Lino López, admitiu que o BAXI non saltou ben á pista nos primeiros minutos: “Creo que empezamos nerviosas, precipitadas en ataque pero sobre todo mal en defensa”, aseguraba. Na súa opinión, o acerto do rival estivo marcado por “tiros liberados, de malas defensas, malos axustes, situacións que tiñamos preparadas de defensa onde anotan con moita facilidade”. A historia cambiou no segundo parcial, cando as ferrolás aumentaron a intensidade en defensa, e melloraron o seu ataque, con “menos precipitacións e menos perdas. Esa foi a clave”.

A conclusión de Lino López despois de xogar este duelo e coa vista posta na semifinal do domingo, é que “somos un equipo que temos que estar os 40 minutos concentradas en defensa, presionando e desgastando ao rival e ao final ese desgaste fai que teñan unha selección de tiro peor ou que baixen as súas porcentaxes por desgaste físico”. O adestrador apunta a que cada xogadora é importante porque “ao final é todo o equipo o que suma”.

Sober o regreso de Irene Gari ás pistas, o técnico resaltou que aínda está collendo ritmo, despois de case un mes alonxada das pistas. Porén, recalcou a súa importancia para o equipo, dentro e fóra do campo: “É unha xogadora que sempre suma para o equipo, estea dentro ou fóra da pista. Fai cousas intanxibles que non se ven nas estatísticas, pero é moi importante”.

O duelo das irmás Leaupepe

Este encontro foi dobremente especial para dúas xogadoras, as irmás Leaupepe. Geraldynn (BAXI) e Geralynn (Jairis) reencontraronse na pista do Leganés, cada unha a un bando da pista. O destino quixo cruzar a estas xemelgas de Samoa no mesmo grupo, e agora só Dynn disputará a semifinal e terá opcións de xogar na LF Endesa.

A galería foto gráfica do partido BAXI Ferrol – Jairis

1 de 36

- +