Jenna Allen seguirá sendo xogadora do BAXI Ferrol. O club da cidade departamental confirma a súa primeira renovación cara a tempada 2021/2022, onde contará coa pivote estadounidense. Con este anuncio, a xogadora cumprirá a súa terceira tempada coa camiseta do equipo ferrolán, ampliando o seu contrato.
A propia baloncestista asegura que decidiu continuar co conxunto galego porque “amo e respecto aos meus adestradores e compañeiras de equipo. Tamén á afección, que me quere moito. Quero seguir estando preto deles”.
O equipo do BAXI aposta pola calidade de Allen, que demostrou a súa importancia para o club dentro e fóra do terreo de xogo.
A lesión apartou a Jenna da pista, pero non do BAXI
Esta tempada foi accidentada para a pivote do BAXI Ferrol. Unha lesión por rotura no tendón de Aquiles impediu que completara a campaña de 10 das ferrolás dentro das pistas.
Porén, Allen nunca deixou de ser peza clave nos vestiario do equipo universitario e desde o banco seguiu apoiando ao equipo. Por iso, o club segue a contar con ela e a renova para a seguinte campaña.
A pivote decidiu quedar en Ferrol para realizar a rehabilitación e viviu o ascenso á LF Endesa. Agora, coa tempada xa rematada, segue as pautas de recuperación no seu país natal, Estados Unidos, dando pasos para chegar na mellor forma posible á pretempada do BAXI.
Nas súas palabras, “a miña recuperación avanza moi ben. Volverei á pista moi pronto e traballarei moito para chegar a Ferrol en plenas condicións”.
Lino López, adestrador do BAXI Ferrol: “O club e eu decidimos renovar a Jenna no momento no que se lesiona”
Pola súa parte, o adestrador Lino López, afirma que o club sempre confiou nela: “O club e eu decidimos renovar a Jenna no momento no que se lesiona. Sempre digo que o máis importante á hora de contratar xogadoras é que sexan boas persoas, boas compañeiras… e o club non tiña ningunha dúbida de que Jenna o é e merecíase seguir e que iso a motivase e lle dera a seguridade de que nós confiábamos nela. Estamos seguros de que vai ser unha peza fundamental”.
A pivote xa pensa na próxima tempada
Para a vindeira campaña, Jenna Allen ten as ideas claras no club ferrolán. “Espero que o equipo afronte cada adestramento e cada partido con moito traballo e humildade”, declarou.
A xogadora estadounidense convírtese na primeira xogadora confirmada do novo proxecto do BAXI Ferrol na máxima categoría, a Liga Endesa.
Jenna Allen: “Este ano co novo Aquiles e en Primeira División, eu podo facelo”
“O ano pasado non puiden estar nas pistas. Este ano co novo Aquiles e en Primeira División, eu podo facelo”, afirmaba positiva nas redes do equipo.
Si hay alguien que ha demostrado que #SienteElUni es ella.
Arrancamos con la plantilla del BAXI Ferrol 2021-2022.#DisfrutarDelCamino pic.twitter.com/V3Z15STuWo
— Baxi Ferrol (@UniFerrol) May 5, 2021
