Cinco vitorias de cinco partidos. Líder indiscutible e nesta xornada case duplica os puntos do seu rival. Así de intratable está o BAXI Ferrol neste arranque de tempada 2020-21.
Até o momento ninguén é capaz de seguir o ritmo que impón o BAXI Ferrol nos partidos. Esta mañá volveu demostrar que a intensidade defensiva do cadro ferrolán acaba por sacar de punto a todos os seus adversarios. Iso comprobouno o Azkoitia Azpeitia desde o inicio do choque, no que as departamentais se foron cun 0-8 e partir de aí levaron sempre a dianteira, aínda que no primeiro cuarto o cadro vasco foi capaz de competir, chegando ao seu final cun 20 a 26.
Con todo, no segundo parcial, as xogadoras ferrolás subiron o nivel defensivo e cunha presión sobre a saída de balón do rival, lograron roubar moitos balóns e anotar canastras fáciles, entre elas nove triplas coas que chegaron ao descanso. O dito, intratables. Xa neste momento do partido deixaron choque case sentenciado. As xogadoras retiráronse aos vestiarios cun claro 28-59 campeando no marcador electrónico.
Á volta de vestiarios, o guion foi moi similar, co BAXI Ferrol presionando a toda a pista e impedindo que o seu rival anotase con facilidade, o que levou a que a diferenza se incrementase, sen que o conxunto vasco fose capaz de seguir o ritmo que impuñan as pupilas de Lino López, que terminaron o terceiro cuarto cun 39-76.
Se unha cousa destaca no equipo ferrolán esta tempada é que as súas xogadoras non afrouxan en ningún momento e seguiron coa presión e unha intensidade moi alta, que lle daba moitas opcións de correr e anotar fácil, o que provocou que a diferenza entre ambas as escuadras fósese incrementando até chegar ao final do encontro co cómodo triunfo por 52-99.
Desta forma, o BAXI Ferrol mantense á fronte da táboa clasificatoria con cinco triunfos noutros tantos partidos. Síguelle o Celta Zorka Recalvi, segundo con catro partidos disputados e so un perdido.
FICHA TÉCNICA
AZKOITIA AZPEITIA: Sara Iparragirre (8), Alazne Lizundia Arozena (10), Marguerite Manuela Effa (10), Morgan Asha Symouree Green (15) e Crystal Desiree Primm (3) – quinteto inicial -. Tamén xogaron: Saioa Altzaga Gibaja (2), María Otaegi (-), Intza Lizarazu Jauregui (6), Paula Sanjuan Esnaola (-), Aitziber Vesga (2) e Izaro Lizundia (-)
BAXI FERROL: Laura Fernández (-), Irene Gari Gilabert (23), Julieta Mungo (5), Geraldynn Leaupepe (13) e María Anniina Aijanen (5) – quinteto inicial -. Tamén xogaron: Patricia Cabrera (23), Patricia Benet (2), Natalia Rodríguez (5), Andrea Boquete (12) e Sune Swart (11).
PARCIAIS: 20-26, 8-33, 11-17 e 13-23
ÁRBITROS: Aitor Gómez Hernández e Pablo Mirantes Ibabe.
INCIDENCIAS: Partido correspondente á 5ª xornada da Liga Feminina 2 da FEB, disputado no Pavillón Polideportivo de Azkoitia en Azkoitia (Guipúzcoa).