Mañá, sábado 20 de marzo ás 19.00 horas, o BAXI Ferrol xoga o seu último partido da tempada na súa cancha da Malata. E o fai diante doutro conxunto galego, o Celta Zorka Recalvi. Contra as viguesas, as ferrolás saltarán á cancha á procura da súa vixésimo quinta vitoria consecutiva no grupo A da Liga Feminina 2.
Será un duelo galego de altura, xa que visita o cadro departamental o segundo clasificado, que necesita o triunfo para garantir ese posto ao final da liga regular, xa que de perder podería ceder esa praza ao Osés Construcciones Ardoi. Así pois, as que máis se xogan neste cruce son as celestes.
O equipo vigués perdeu o pasado mércores ante o Cortegada, truncando unha liña de once vitorias. É un conxunto moi poderoso, con xogadoras interiores con experiencia na máxima categoría e a chegada da americana Motley deulle un salto de calidade importante.
Final #LF2@ADCORTEGADA 6️⃣9️⃣
Celta Zorka Recalvi 6️⃣3️⃣ pic.twitter.com/U2thyCmwkA— CELTA BALONCESTO 💙 (@Celtabaloncesto) March 17, 2021
O adestrador do conxunto ferrolán, Lino López destaca do rival celeste que “é un equipo cun gran potencial en todas as súas liñas e está nun gran momento, a pesar de perder ante o Cortegada. Conta con xogadoras desequilibrantes e con moita experiencia”.
Lino López, BAXI: “É como un partido de fase e medirá a nosa preparación”
Para afrontar este encontro ante o Celta Zorka Recalvi, o equipo ferrolán conta con todas as súas xogadoras en perfectas condicións. Lino López comenta sobre o encontro que “para nós é como un partido de fase, porque vai ser moi esixente e os detalles son os que poden decantar a balanza para un dos dous bandos. Serviranos para medir o noso momento de preparación para a fase de ascenso”.
O pavillón da Malata acollerá durante o encontro a trescentos espectadores e os que non poidan acudir ao recinto poderán seguir o partido a través de canalfebtv.
A fase de ascenso á Liga Endesa será en Leganés
A Federación Española de Baloncesto decidiu que a fase de ascenso á liga Feminina Endesa se xogase entre os días 8 e 11 de abril en Leganés. Nesa cita estarán presentes doce formacións, das que, polo momento, teñen a súa praza asegurada sete escuadras.
As viguesas que adestra Cristina Cantero, non queren deixar ir a súa e menos nun duelo de rivalidade galega. Con estos vimbios, agárdase na Malata un partido de alto nivel de xogo e grande dose de entrega por ambas as dúas entidades, as dúas escuadras galegas da Liga Feminina 2 máis en forma neste curso 2020-2021.
