O BAXI Ferrol suma unha nova derrota competitiva, e ve perigar o seu posto na LF Endesa. As xogadoras adestradas por Lino López volveron este mércores á competición tras o parón internacional e non foron quen de poñer fin ao mal momento deportivo. O seu rival na pista e na táboa, o Tenerife, foi superior de principio a fin, levándose a vitoria (73-58).
“Foi un partido no que elas tiveron a iniciativa durante todo o encontro. Tiveron acerto exterior e as vantaxes que tiñan as interiores. Nós sempre fumos a remolque e non fumos capaces de enchufarnos de verdade”, apuntaba o adestrador das galegas tras o partido.
Como contrapunto positivo, recoñece que “estivemos acertadas no tiro exterior que é unha das nosas bazas”. Con todo, “tampouco xogamos con orde e criterio. Xuntáronse moitos factores que lles fixeron xustas merecedoras da vitoria“, concluíu López.
O BAXI foi por detrás durante o partido
Desde os primeiros compases do partido, o Tenerife levou o bastón de mando, obrigando ao BAXI Ferrol a xogar ao seu ritmo. As canastras non entraban con facilidades nos minutos iniciais, e malia os acertos das visitantes na zona, o tiro exterior das locais inclinaba a balanza ao seu favor.
No segundo cuarto, o Tenerife seguía marcando o tempo do encontro, e pasado o ecuador deste parcial a súa vantaxe subía aos 12 puntos. Entón, as ferrolás aumentaron o nivel, logrando reducir distancias grazas a unha inspirada Swart. Con todo, as canarias seguían liderando o partido e non tiveron problema para manter a súa superioridade, deixando o marcador no 37-33 para o descanso.
Tras a reanudación, o equipo de Claudio García mantivo a súa superioridade na defensa e tamén no ataque, onde Gorecki e Monique sumaban un punto detrás doutro. A base de tiros de tres, o cadro local aumentaba o seu colchón de puntos (60-49).
No último tempo, o guión non mudou. Malia que o BAXI soñaba coa posible remontada, pero o Tenerife non daba opcións ás galegas. O equipo ferrolán seguía sumando grazas a xogadoras como Ivanovic (a mellor das universitarias xunto a Koenen), pero de novo os triplos marcaron o partido, deixando o triunfo en terras canarias (73-58).
Con sete derrotas consecutivas e cun só partido pendente (ante o Leganés), as ferrolás ocuparán a posición de colista ao remate da xornada, con 23 puntos. Sen tempo para descansar, o domingo o conxunto galego terá unha nova oportunidade de salvar a categoría, xogando na Malata ante o Euskotren.
FICHA TÉCNICA
TENERIFE: Gorecki (20), Raksanyi (6), Hruscakova (13), Plaisance (15) e Castillo (2). Tamén xogaron: Montenegro (5), Rodríguez (-), Olano (-), Senosiain (-), Krivacevic (9), Pina (-) e Mayombo (3).
BAXI FERROL: Koenen (13), Ivanovic (14), Grande (3), Allen (9) e Swart (8). Tamén xogaron: Villegas (5), Gari (-), Cabrera (-), Leaupepe (2) e Rodríguez (4).
MARCADOR: 21-14, 16-19, 23-16 e 13-9.
ARBITRAXE: Cañigueral, García e Palanca.
INCIDENCIAS: Partido correspondente á 20ª xornada da LF Endesa disputada no pavillón Santiago Martín de Santa Cruz de Tenerife.
