Nova xornada de derrota para os equipos galegos da LF Endesa. Tanto o BAXI Ferrol como o Durán Maquinaria Ensino tropezaron na fin de semana no segundo partido da semana tras o parón.
En Ferrol, as universitarias foron de menos a máis nun partido no que recibían a un rival duro, o Movistar Estudiantes, que finalmente se levou os puntos da vitoria. Pola súa parte, as lucenses loitaron o partido ante o Lointek Gernika, pero non foron capaces de vencer o duelo. Neste encontro, Georgina Bahí, do Ensino, foi declarada MVP.
O BAXI pasa a ser o farolillo vermello
Para este novo partido da Liga Endesa, Lino López apostou por un quinteto formado por Koenen, Ivanovic, Grande, Allen e Swart, que saltaron á pista da Malata dispostas a levarse o partido, despois de catro derrotas consecutivas.
Porén, o Movistar Estudiantes fixo gala do seu nivel desde un primeiro momento, limitando as opcións das galegas. No primeiro parcial, as madrileñas non paraban de acertar baixo o aro, ante unha defensa galega febre. As locais mantíñanse no partido a base de tiro exterior, finalizando os primeiros dez minutos cun 15-21.
Para o segundo tempo, as visitantes mantiveron o seu acerto anotador, mentres que o BAXI seguía sen atopar o seu xogo. Carmen Grande levantaba ás galegas a base de tiros, pero o guion non mudou e o descanso chegou co 28-43.
Na segunda parte, o BAXI Ferrol saiu con forza ao parqué da Malata, para reducir distancias coas súas rivais. Ao acerto de Grande sumouse o de Koenen, Swart, Ivanovic e Allen para impoñerse por primeira vez nun cuarto, aínda que os puntos sumados aínda non daban a vitoria ás galegas.
O Movistar Estudiantes non perdoaba, sendo superior no xogo interior e o exterior. As forzas igualáronse neste derradeiro cuarto, pero o impulso das ferrolás non foi suficiente para lograr a remontada. O partido rematou cun 68-78, deixando ao equipo de López na derradeira posición da táboa, con once puntos.
O Ensino acumula tres derrotas consecutivas
En Lugo, o Ensino sumou unha nova xornada sen gañar, acusando o seu plantel tocado, ao que agora se suma a marcha de Paola Ferrari.
Na primeira metade do encontro, o equipo galego e o Lointek Gernika competiron man a man, cun lixeiro dominio das visitantes. O conxunto adestrado por Miguel Ángel Ortega se mantivo forte na súa pista, controlando o xogo interior das vascas. Pasados os dez primeiros minutos, as lucenses colleron ritmo, e reduciron distancias coas rivais. O descanso chegaría cun axustado 31-33 e o partido aínda aberto.
Porén, na segunda metade, o Lointek impúxose con soltura ante as galegas, circulando con liberade o balón e acertando nos tiros de longa distancia. Cun parcial 0-8 tras a reanudación, o Ensino quedou tocado, e viuse superado neste cuarto.
Para os dez últimos minutos, as de Ortega melloraron as accións defensivas, pero sen acerto nos tiros, a remontada quedou lonxe e o encontro rematou cun 52-64. Malia a derrota, Georgina Bahí do club lucense foi elixida MVP, con 17 créditos de valoración, 10 puntos e 7 rebotes.
